Voleıbol: «Aqtóbe» klýby «Jetisýdan» aılasyn asyrdy

ASTANA. KAZINFORM — Kókshetaýdan voleıboldan erlerdiń ulttyq lıga komandalary arasynda Qazaqstan chempıonaty tórtinshi úlken týrynyń oıyndaryna núkte qoıyldy.

Búgin ortalyq match kósh basyndaǵy Taldyqorǵannyń «Jetisý» klýby men «Aqtóbe» arasynda boldy.

Bul joly Sergeı Trıkozdyń shákirtteri Marat Adryshev jattyqtyratyn «Jetisýdy» 3:0 (29:27, 25:22, 25:18) esebimen jeńdi. 

Soǵan qaramastan, taldyqorǵandyqtar 69 upaımen kósh basynda qaldy. Ekinshi oryndaǵy «Aqtóbeniń» eki upaıy kem.

Ótken jylǵy el chempıony «Jaıyq» komandasy kútpegen jerden besinshi satydaǵy «Býrevestnıkke» (Almaty) jol berdi — 1:3 (23:25, 11:25, 28:26, 34:36).

Budan keıin «Atyraýdyń» oraldyqtardy basyp ozatyndaı múmkindigi bar edi. Alaıda olar da «Ushqyn-Kókshetaýdan» utylyp qaldy — 0:3 (21:25, 19:25, 18:25).
«Jaıyq» 58 upaımen úzdik úshtikti túıindese, «Atyraý» (56 upaı) tórtinshi satyda qaldy.

«Taraz» kósh sońyndaǵy «Esilden» (SQO) aılasyn asyrdy — 3:0 (25:20, 25:22, 25:18).

Eske sala keteıik, budan buryn «Jaıyq» klýbynyń «Jetisýdyń» jeńis serııasyn toqtatqanyn jazǵan bolatynbyz.

«Jaıyq» voleıbol klýbynyń Azııa chempıondar lıgasyndaǵy qarsylasy anyqtaldy.