Voleıbol: «Aqtóbe» klýby Azııa chempıondar lıgasynyń jartylaı fınalynan tys qaldy

ASTANA. KAZINFORM – Japonııada voleıboldan erler komandalary arasynda ótip jatqan Azııa chempıondar lıgasynyń shırek fınalynda «Aqtóbe» men qatarlyq «Al-Raııan» synǵa tústi.

Qatarlyq voleıbolshylar alǵashqy eki sette basymdylyq tanytty - 25:20, 25:18.

Úshinshi sette Sergeı Trıkozdyń shákirtteri ese qaıyrdy – 25:23. Alaıda tórtinshi partııada qatarlyqtar qarqyndy oınady – 25:20. Qorytyndy esep – 3:1, «Al-Raııan» komandasynyń paıdasynda.

Osylaısha, Azııa chempıondar lıgasyna alǵash ret qatysyp otyrǵan «Aqtóbe» jartylaı fınalǵa óte almaı, júldeli oryndardan tys qaldy.

Ótken maýsymda el kýbogy men sýperkýbokty utyp alǵan aqtóbelikter Qazaqstan chempıonatyn kúmis júldemen aıaqtaǵan edi.

Eske sala keteıik, budan buryn voleıboldan Azııa chempıondar lıgasynda «Aqtóbe» qatarlyq komandamen oınaıtynyn jazǵan edik.