Voleıbol: «Aqtóbe» chempıondyq úshin alǵashqy kezdesýde «Jaıyqty» jeńdi
ORAL. KAZINFORM — Oral qalasyndaǵy «Jaıyq arena» sport kesheninde voleıboldan erlerdiń ulttyq lıga komandalary arasynda Qazaqstan chempıonatynyń fınalynda «Jaıyq» pen «Aqtóbe» alańǵa shyqty.
«Jaıyqtyń» bas bapkeri Vıktor Kozıktiń Qazaqstan ulttyq quramasyn jattyqtyratyny belgili.
Al «Aqtóbe» tizginin ustap, osy maýsymda kýbok pen sýperkýbokty utyp alǵan Sergeı Trıkoz elimizdiń jastar quramasyna jetekshilik etip keledi.
Qos bapker de búgingi basty oıynda tájirıbeli voleıbolshylarǵa senim artty. Oraldyqtardan komanda kapıtany Vıtalıı Vorıvodın men Vladımır Prokofev, «Aqtóbeden» Aıbat Netalın, Damır Ákimov, Nadyrhan Qadyrhanov ulttyq qurama sapynda da óner kórsetedi.
«Jaıyqtyń» baılanystyrýshysy, ýkraınalyq Volodımır Kovalchýktiń jasy 40-ta bolsa, onyń «Aqtóbedegi» otandasy, Qazaqstan birinshiliginde birneshe komanda quramynda chempıon atanǵan Roman Handrolın 42-de, reseılik Kırıll Kostylenko 43-te edi.
Turaqty chempıonat barysynda úsh kezdesýdiń ekeýinde «Aqtóbe» basym bolsa, bireýinde «Jaıyq» jeńgen edi.
Bul joly birinshi partııada aqtóbelikter birden 7:2 esebimen alǵa ketip, shabýylmen birge tosqaýyldy sátti qoıa bildi — 25:15.
Ekinshisinde alań ıeleri dál sondaı eseppen qarymta qaıtardy — 25:15.
Úshinshi set «Aqtóbeniń» paıdasyna sheshildi — 25:19.
Match barysynda «Jaıyqtan» V.Kovalchýkty taǵy bir baılanystyrýshy, qazaqstandyq Ýmıd Nabıev almastyrdy.
Oraldyqtar tórtinshi partııada birte-birte kúsh alyp, 19:14 esebimen alǵa shyqty. Aqtóbelikter de oıynshylaryn aýystyryp, esepti qysqartty — 18:20. Biraq «Jaıyqty» toqtata almady — 21:25.
Sheshýshi, besinshi sette reseılik Nıkıta Shvalev dopty oıynǵa qosqan sátte aqtóbelikter 5:0 esebimen alda turǵan edi. Dál osy kezde Vladımır Prokofevtiń eısteri arqasynda «Jaıyq» tarazy basyn teńestirip qana qoımaı, ózi alǵa ketti — 7:5. Esep 14:13 bolǵan mezette tóreshiler beınejazbany uzaq qarap, sheshýshi upaıdy aqtóbelikterge berdi — 15:13. Qorytyndy esep — 3:2.
Erteń qos komanda ekinshi fınaldyq kezdesýin ótkizedi.
Eske sala keteıik, budan buryn voleıboldan Qazaqstan chempıonatynda qola júlde úshin básekede «Jetisý» klýbynyń «Atyraýdan» basym túskenin jazǵan edik.