Voleıbol: «Aqtóbe» 7 match boıy jeńilmeı kele jatqan «Jetisýdy» utty
ORAL. KAZINFORM — Oral qalasyndaǵy «Jaıyq arena» sport kesheninde voleıboldan erlerdiń ulttyq lıga komandalary arasynda Qazaqstan chempıonaty úshinshi úlken týrynyń oıyndary máresine jetti.
Sońǵy kúni ortalyq match týrnır kestesinde birinshi jáne ekinshi orynda kele jatqan «Aqtóbe» men «Jetisý» klýbtary arasynda boldy.
Marat Adryshev baptaıtyn taldyqorǵandyqtar osyǵan deıin jeti kezdesý boıy jeńilmeı kele jatqan edi.
Degenmen bul joly Sergeı Trıkozdyń shákirtteri «Jetisýǵa» tosqaýyl qoıa aldy – 3:1 (25:12, 22:25, 25:23, 25:19).
Úsh týrdan keıin taldyqorǵandyqtar 53 upaımen kósh bastasa, aqtóbelikter (49 upaı) olarǵa jaqyndaı tústi.
Oraldyń «Jaıyǵy» men «Atyraý» klýbtary 44 upaımen úshinshi-tórtinshi oryndy bólisip tur.
«Jaıyq» sońǵy oıynda Almatynyń «Býrevestnıgin» 3:0 (25:14, 25:15, 25:20) esebimen tize búktirdi. Al atyraýlyqtar «Ushqyn-Kókshetaýdan» aılasyn asyrdy – 3:1 (25:17, 17:25, 25:14, 25:18).
«Taraz» SQO-nyń «Esilin» qapy qaldyrdy – 3:1 (25:19, 19:25, 25:15, 26:24).
Eske sala keteıik, budan buryn voleıboldan «Jetisýdyń» qatarynan 6 oıynda jeńiske jetkenin jazǵan edik.
Sondaı-aq «Turan» Ortalyq Azııa chempıondar lıgasynda kúmis júldeger atandy.
Atyraýlyqtar «Jetisý» klýbyn toqtata almady.
