Volfgang Ishınger álem kóshbasshylaryn BUU-nyń bedelin nyǵaıtý isine atsalysýǵa shaqyrdy
«Ashyǵyn aıtý kerek, ujymdyq kúsh-jiger eń qaýipti daǵdarystar men halyqaralyq qaýipsizdiktiń qaterlerin retteý úshin jetkiliksiz. Adamdardyń ómiri qıylyp jatyr, qarýlaný jarysy jańa qarqyn ala bastady, jahandyq jylyný jalǵasýda. Sondyqtan álemdegi eń yqpaldy adamdardyń bul turǵyda tek sharasyzdyq tanytýy durys emes. Atap aıtqanda, bul ahýal qazirgi qaýipti jaǵdaıda óte tıimsiz bolyp tur», - dedi V. Ishınger Mıýnhen qaýipsizdik konferentsııasynyń 56-shy otyrysynda.
Onyń paıymynsha, osynyń saldarynan yntymaqtastyq pen beıbitshiliktiń ornyna óshpendilik pen qaqtyǵystar beleń alýda.
«Búgingi jıyndy paıdalana otyryp, birneshe eskertýdi atap ótkim keledi. Biz barshamyz BUU bedelin nyǵaıtýǵa belsendi úles qosýymyz kerek. Onyń ishinde BUU Qaýipsizdik Keńesin de nazarda ustaýymyz kerek. Ol sheshimderdi oryndaý úshin ókilettigi bar jalǵyz organ. Qaýipsizdik Keńesi Lıvııa boıynsha qarardy qabyldaǵan kezde osy aptanyń basynda qandaı da bir úmit paıda boldy. Osy oraıda elderdiń basym kópshiligi osy sheshimniń talaptaryn ustanady dep senim bildiremiz», - dedi Volfgang Ishınger.
Budan buryn habarlanǵandaı, Memleket basshysy Qasym-Jomart Toqaev Germanııadaǵy Mıýnhen qaýipsizdik konferentsııasyna qatysýda.
Mıýnhen qaýipsizdik konferentsııasynyń 56-shy otyrysy 2020 jyldyń 14-16 aqpany aralyǵynda ótedi. Atalǵan is-sharaǵa 40-qa jýyq memlekettiń basshylary, 100-den astam syrtqy ister jáne qorǵanys mınıstrleri, halyqaralyq qatynastar salasyndaǵy bedeldi sarapshylar, Eýrokomıssııa ókilderi, sondaı-aq Eýropalyq parlament depýtattary qatysýda.
Aıta keteıik, jyl saıyn forýmǵa álemniń 70 elinen 400-600 adam qatysady. Olardyń arasynda memleket jáne úkimet basshylary, áskerı ári saıası kóshbasshylar, mınıstrler kabınetiniń músheleri, Parlament depýtattary, ǵalymdar, saıasattanýshylar, azamattyq qoǵam ókilderi bar.
QazAqparat búgin Memleket basshysy Qasym-Jomart Toqaevtyń Germanııanyń Mıýnhen qalasyna jumys saparymen barǵandyǵyn jazdy.
