Vokzaldarda múgedektigi bar jolaýshylarǵa arnalǵan jańa súıemeldeý qyzmeti iske qosyldy

ASTANA.KAZINFORM - Ulttyq tasymaldaýshy «QTJ» UK» AQ-nyń «Magıstraldyq jeli dırektsııasy» fılıalymen birlesip, múgedektigi bar jolaýshylarǵa arnalǵan jańa súıemeldeý qyzmetin iske qosty.

QR Kólik mınıstrligi baspasóz qyzmetiiniń habarlaýynsha, atalǵan servıs vokzal qyzmetkerleriniń kómegin aldyn ala rásimdeýge múmkindik berip, jolaýshyny avtokólikten vagonǵa deıin jáne keri baǵytta, sondaı-aq, vokzal aýmaǵynda tolyq súıemeldeýdi qamtamasyz etedi.

Temirjol kóligimen saparlaý kezinde kómek alý ótinimin bilet.railways.kz saıtynda rásimdeýge bolady.

Qazirgi tańda qyzmet arnaıy arbalarmen jabdyqtalǵan 57 vokzalda qoljetimdi. Eger tańdalǵan vokzalda qyzmet ýaqytsha kórsetilmese, bılet rásimdeý kezinde tıisti optsııalar kórinbeıdi.

Qyzmetti rásimdeý úshin:
1. bilet.railways.kz saıtynan bılet satyp alý;
2. Satyp alý barysynda «Múgedek» optsııasyn tańdap, JSN men múgedektik týraly anyqtamanyń nómirin kórsetý;
3. Qajetti kómek túrlerin belgileý kerek.

Qoljetimdi kómek túrleri:
• poıyz jóneltiler aldynda vokzal qyzmetkeriniń súıemeldeýi;
• poıyz jóneltiler aldynda arnaıy arba usyný;
• poıyzdan túsý kezinde vokzal qyzmetkeriniń súıemeldeýi;
• poıyzdan túsý kezinde arnaıy arba usyný.

Ótinimdi aldyn ala rásimdeý vokzal qyzmetkerlerine der kezinde daıyndalyp, jolaýshyǵa sapardyń barlyq kezeńinde ýaqtyly ári tolyqqandy kómek kórsetýge múmkindik beredi.

Aıta keteıik, múmkindigi shekteýli jolaýshylar úshin jol júrýge jeńildikti sharttar qarastyrylǵan:

• áleýmettik mańyzy bar baǵyttarda — 50% jeńildik;
• kommertsııalyq «Talgo» poıyzdarynda arnaıy kýpelerge, onyń ishinde ilesip júretin adamǵa arnalǵan orynǵa — 50% jeńildik.

Qosymsha aqparatty 1433 tegin nómiri arqyly, sondaı-aq «Jolaýshylar tasymaly» AQ-nyń resmı Instagram paraqshasynan @jolaushylar_tasymaly bilýge bolady.

Osyǵan deıin elimizde 40 jyl boıy jóndeýden ótpegen vokzaldar jańa kelbetke ıe bolatyny týraly jazdyq.