Vokzaldarda «qyzyl» mártebemen poıyzǵa otyrmaq bolǵan 500 adam anyqtaldy

NUR-SULTAN. QazAqparat - Vokzaldarda Ashyq baǵdarlamasy engizilgennen bergi ýaqytta 500-den astam «qyzyl» jáne 239 «sary» mártebesi bar adam anyqtaldy, dep habarlaıdy QazAqparat.

Bárinen de oqshalanýdy elemeı, aınalasyndaǵy adamdardy qaýip-qaterge tigetinder qatary Nur-Sultan qalasynda kóp bolyp shyqty.

Elordalyq vokzaldar aýmaǵynda «sary» jáne «qyzyl» mártebesi bar 177 azamatqa kirýge ruqsat berilmegen.

«Qazaqstan temir joly» UK» AQ vokzaldarǵa tek «kók» jáne «jasyl» mártebesi bar adamdar ǵana jiberiletinin eske salady. PTR taldaýy qajet emes.

Kelýshilerde gadjet bolmaǵan jaǵdaıda vokzal qyzmetkerleri JSN boıynsha statýsty tekseredi.

Paıdalanylmaǵan bıletterdi qaıtarý úshin «sary» nemese «qyzyl» mártebesi anyqtalǵan jolaýshylarǵa:

- WhatsApp mobıldi qosymshasy arqyly myna nómirge [phone] oryndardy tapsyrý úshin jol júrý qujatynyń (bılettiń) foto/skrınshotyn; «Ashyq» qosymshasynan mártebeniń foto/skrınshotyn jáne jeke basyn rastaıtyn qujattyń fotosýretin (pasport/kýálik/týý týraly kýálik jáne t.b.) jiberý kerek.

- 6 aı ishinde (poıyz jóneltilgen kúnnen bastap) «Jolaýshylar tasymaly» AQ-nyń kez kelgen bılet kassasyna jolaýshynyń jeke basyn rastaıtyn qujattyń túpnusqasymen kelip, paıdalanylmaǵan jol júrý qujattaryn qaıtarý úshin (1-tarmaq oryndalǵan jaǵdaıda) ótinish jazýǵa bolady.

Paıdalanylmaǵan bıletti qaıtarý somasy jolaýshy, bagaj, júk-bagaj jáne poshta jóneltilimderin temir jol kóligimen tasymaldaý qaǵıdalaryna sáıkes júrgiziledi.