Vokzaldan kitaphanaǵa deıin: óńirlerde jańa nysandar iske qosyldy
ASTANA. KAZINFORM — Qazaqstan óńirlerinde jańa áleýmettik jáne ınfraqurylymdyq nysandar paıdalanýǵa berildi, dep habarlaıdy Úkimettiń baspasóz qyzmeti.
Memleket basshysy Qasym-Jomart Toqaevtyń tapsyrmalaryn oryndaý aıasynda el óńirlerinde ınfraqurylymdy damytý jáne azamattardyń ómir súrý sapasyn arttyrý boıynsha júıeli jumys júrgizilip jatyr. Atap aıtqanda, jańa áleýmettik jáne kólik nysandary paıdalanýǵa berildi.
Tómende ótken aptada iske qosylǵan negizgi jobalar berilgen:
- Túrkistan oblysynda ǵasyrlyq tarıhy bar «Túlkibas» temirjol vokzalynyń rekonstrýktsııasy aıaqtaldy.
Keshen táýligine shamamen 200 jolaýshyǵa qyzmet kórsetýge eseptelgen. Kútý zalynyń syıymdylyǵy eki esege artyp, 90 orynǵa jetti. Ǵımaratta múmkindigi shekteýli azamattar úshin kedergisiz orta qalyptastyrylǵan. Munda kassalar, anyqtama bıýrosy, tamaqtaný oryndary, ana men bala bólmesi jumys isteıdi.
- «Aýyl – El besigi» memlekettik baǵdarlamasy aıasynda Jambyl oblysynyń Nurlykent aýylynda ámbebap zaly men zamanaýı sporttyq qural-jabdyqtary bar jańa sport kesheni ashyldy.
Jalpy óńirde 2 465 sport nysany jumys isteıdi. Ótken jyly 10 sport kesheni paıdalanýǵa berilse, bıyl taǵy 12 keshenniń qurylysyn aıaqtaý josparlanǵan.
- Almaty oblysynyń Jibek joly aýylynda quny 658 mln teńge bolatyn 200 oryndyq Mádenıet úıi ashyldy.
Aýmaǵy 5 gektardy quraıtyn keshen sahna, kórermender zaly jáne shyǵarmashylyq úıirmelerge arnalǵan kabınettermen jabdyqtalǵan. Nysan bazasynda ulttyq óner úıirmeleri, «Shejire» aqyndar ortalyǵy jáne aǵa býyn ansambli jumysyn bastady.
- Prezıdenttiń «Kitap oqıtyn ult» jobasyn júzege asyrý jónindegi tapsyrmalary aıasynda Almatyda qalalyq kitaphanalardyń kitap berý pýnktteri ashyla bastady.
Alǵashqy pýnkt Jetisý aýdanyndaǵy saýda ortalyǵynda ashylyp, 2 myńnan astam kitap qory jınaqtaldy. Bul kitaphana qyzmetterin qala turǵyndary úshin qoljetimdi ete tústi.
Buǵan deıin habarlanǵandaı, elimizde jańǵyrtylǵan 70 temirjol vokzaly paıdalanýǵa berildi.
