Vogue jýrnaly koronavırýstan qaıtys bolǵandardy eske alý úshin birinshi ret aq muqabamen shyǵady
MILAN. QazAqparat – Italııalyq Vogue sán jýrnalynyń bas redaktory Emanýel Farnetı óziniń Instagram paraqshasynda jýrnaldyń kelesi sany aq muqabamen shyǵatyny týraly post jarııalady. Ol aq tústi «qurmet, jańarý jáne únsizdik» belgisi retinde tańdaǵanyn atap ótti. Bul týraly QazAqparat agenttigi Dailymail basylymyna silteme jasap habarlaıdy.
Jýrnaldy aq muqabamen shyǵarý týraly ıdeıa shyǵarmashylyq dırektory Ferdınando Verderıge tıesili.
Emanýel Farnetı kóp ýaqyt jumys istegen jobalardy keıinge ysyryp qoıǵanyn málim etti. Onyń aıtýynsha, jýrnaldyń baǵyty shynaıy ómirden alystamaýy kerek.
Ol Instagram paraqshasynda aq muqabamen jaryq kórgen jýrnaldyń sýretimen bólisip, «Vogue Italia-nyń sáýirdegi shyǵarylymy 10-y, ıaǵnı juma kúni jaryq kóredi» dep jazdy.
Aq tústi neliktegen tańdaǵanyn ol bylaısha túsindirdi: «Tolyǵymen aq muqaba shyǵarý ıdeıanyń joqtyǵyn bildirmeıdi. Aq tús kóp maǵyna beredi. Aq – birinshiden, qurmet belgisi. Aq – jańǵyrý, qarańǵydan keıingi jaryqty, barlyq tústiń qosyndysyn bildiredi. Aq – biz úshin óz ómirlerin qaterge tigip júrgen adamdardyń biryńǵaı formasynyń túsi».
Nómirde karantın kezindegi sán taqyryby qozǵalady. Nómirdi shyǵarý úshin 40-tan astam qyzmetshi (fotograftar, sánqoılar, stılıster, kreatıvti dırektorlar, vızajıster) jumys istegen. Olar ózine, otbasy múshelerine nemese dostaryna ınternet arqyly sán úlgisin kórsetý úshin jeke kollektsııasyndaǵy kıimderdi paıdalanǵan.
Avtory: Raýshan Qońyrbaeva
