Vladıvostoktyń eks-ákiminiń otbasynan 821 jyljymaıtyn múlik nysany tárkilendi
ASTANA. KAZINFORM – Vladıvostok qalasynyń burynǵy meri Vladımır Nıkolaevtyń otbasyna tıesili 821 jyljymaıtyn múlik nysany Reseı Federatsııasynyń menshigine ótti. Bul týraly TASS agenttigi Prımore ólkesiniń sot júıesiniń Birikken baspasóz qyzmetine silteme jasap habarlady.

Telegram-arnada jarııalanǵan málimetke sáıkes, 2025 jylǵy 25 shildede Vladıvostok qalasy Lenın aýdandyq soty Reseı Bas prokýrory orynbasarynyń Vladımır Nıkolaevqa, Rımma Nıkolaevaǵa, Vıktorııa Nıkolaevaǵa jáne Elena Zabelınaǵa qarsy talap-aryzy boıynsha sheshim shyǵarǵan.
— Jyljymaıtyn múlik nysandarynyń federaldyq menshikke ótýi sybaılas jemqorlyqtyń aldyn alýǵa baǵyttalǵan talaptar men tyıymdardy buza otyryp alynǵan múlik retinde tanyldy. Barlyǵy 821 nysan memleket kirisine aýdaryldy, – delingen habarlamada.
Olardyń qatarynda «Amýrskıı zalıv» shıpajaıynyń múliktik kesheni, «Magným» apart-oteli jáne 12 jer telimi bar. Baspasóz qyzmeti sot sheshiminiń jyljymaıtyn múlikti memleket menshigine berý bóliginiń dereý oryndalýǵa jatatynyn atap ótti.
Sondaı-aq eks-merdiń otbasynan 590 mıllıon rýblden astam (shamamen 4 mlrd teńge) qarajat óndirildi.
Vladımır Nıkolaev 2004–2008 jyldar aralyǵynda Vladıvostok qalasynyń ákimdigin basqarǵan. Keıin bul qyzmetti Igor Pýshkarev ıelendi. Nıkolaev qalada birneshe kompanııaǵa ıelik etken.
2007 jylǵy 27 aqpanda Prımore prokýratýrasy oǵan qatysty qyzmet babyn asyra paıdalaný jáne ókilettigin teris paıdalaný faktileri boıynsha qylmystyq is qozǵady. Tergeý derekterine sáıkes, sheneýnik jeke kúzetin jáne qyzmettik kóligin polıtsııanyń ilesip júrý qyzmetin qalalyq bıýdjet esebinen zańsyz qarjylandyrǵan.
Sonymen qatar tórt jer telimin jeke tulǵalarǵa zańsyz bergeni úshin aıyptalǵan. Budan kelgen zalal shamamen 17 mln rýbldi (117 mln teńge) quraǵan.
2007 jylǵy 24 jeltoqsanda Lenın aýdandyq soty Vladımır Nıkolaevty 4,5 jylǵa shartty túrde bas bostandyǵynan aıyrý týraly úkim shyǵardy. Úkim 2008 jylǵy 20 aqpanda kúshine endi.
Aıta keteıik, Grekııada Reseı azamaty 118 jylǵa bas bostandyǵynan aıyryldy.