Vladıslav Kosarev trofeılik ańshylyqty damytýǵa qatysty syn aıtty
Aıta keteıik, búgin Májiliste «Qazaqstannyń keıbir zańnamalyq aktilerine týrıstik qyzmet máseleleri boıynsha ózgerister men tolyqtyrýlar engizý týraly» zań jobasyn tanystyryldy. Osy oraıda elimizde trofeılik ańshylyqty damytý usynyldy.
«Sizder kári atalyq janýarlarǵa bırkalardy ilip qoımaqsyzdar. Bizde ańǵa shyqqan adam jybyrlaǵannyń bárin qyryp-joıyp jatady. Bizde ózimizdiń brakonerler az ba? Kıikterdi atyp boldyq, endi olarǵa sheteldikter qosylsa ne bolady? Elimizde kıikpen qatar ınspektordy da atyp jatqan ańshylar bar. Sondyqtan bul baǵytta saqtyq tanytqandaryńyz jón bolar», - dedi depýtat Vladıslav Kosarev zań jobasynyń tanystyrylymynda.
Óz kezeginde QR Mádenıet jáne sport vıtse-mınıstri Órken Bısaqaev trofeılik ańshylyqty engizý túsinigine toqtaldy.
«Búginde zańsyz ańshylyq faktisi bar, brakonerlerdiń kóbisi - bizdiń kórshilerimiz. Olar Qazaqstanǵa kirip, arqarlardy jáne basqa da janýarlardy atyp, alyp ketýde. Tájirıbe kórsetip otyrǵandaı, kóptegen elderde trofeılik ańshylyq engizilgen. Osy oraıda janýarlar popýlıatsııasy tıimdi túrde rettelip turady. Bizde ańshylyqty turaqty damytýdyń tıisti modeli ázirlendi. Ony Aýyl sharýashylyǵy mınıstrligi men tıisti ǵylymı-zertteý ınstıtýttary bekitti. Bul turǵyda kári atalyq janýarlardy atý eskerilgen», - dedi vıtse-mınıstr.
Órken Bısaqaev bul baǵyttaǵy sharalar ǵylymı negizdemeler aıasynda iske asyrylatynyn atap ótti.
Budan buryn habarlanǵandaı, trofeılik ańshylyqty damytýdyń mańyzdy sharalarynyń biri retinde fermerlik ańshylyq sharýashylyǵy salasynda kásipkerlikti qoldaý eskerilgen.
