Vladımır Jumaqanov UQShU QK hatshylarynyń otyrysyna qatysty

ASTANA. QazAqparat - Mınskide Prezıdenttiń kómekshisi - Qaýipsizdik keńesiniń hatshysy Vladımır Jumaqanov UQShU qaýipsizdik keńesiniń hatshylary komıtetiniń otyrysyna qatysty. Bul týraly QK hatshylyǵyna silteme jasap «QazAqparat» HAA habarlady.  

Otyrystyń kún tártibine sáıkes UQShU keńistiginde aqparattyq qaýipsizdik salasyndaǵy ahýal, Uıymnyń jedel den qoıý Ujymdyq kúshteriniń ózara is-qımylynyń tetikterin jetildirý, sondaı-aq ózge de máseleler jóninde pikir almasyldy.

Otyrys aıasynda V. Jumaqanov UQShU-ǵa múshe memleketterdegi áriptesterimen  birqatar kezdesý ótkizdi. Ujymdyq qaýipsizdiktiń zamanaýı syn-qaterleri men qaýipterine qarsy is-qımyl jáne quzyretti memlekettik organdar jelisi boıynsha baılanystardy odan ári damytý máseleleri qaraldy.

Delegatsııa basshylaryn Belarýs Respýblıkasynyń Prezıdenti A. Lýkashenko qabyldady.

Budan basqa, qaýipsizdik keńesteri apparattarynyń ekijaqty konsýltatsııalary aıasynda V.Jumaqanov Belarýs QK-niń Memlekettik hatshysy S.Zaspen kelissóz ótkizdi.

Áskerı, áskerı-tehnıkalyq jáne quqyq qorǵaý salalaryndaǵy ekijaqty ózara is-qımyldyń baǵyttary talqylandy.

Qazaqstanda 2018 jyly qaýipsizdik máseleleri boıynsha eki eldiń konsýltatsııalaryn ótkizýge ýaǵdalastyqqa qol jetkizildi.