Vladımır Zelenskıı prezıdenttik saılaýǵa daıyn ekenin málimdedi

ASTANA. KAZINFORM — Ýkraına prezıdenti Vladımır Zelenskıı saılaýdyń qaýipsiz jaǵdaıda ótýi qamtamasyz etilse, aldaǵy eki-úsh aı ishinde prezıdenttik saılaý ótkizýge daıyn ekenin aıtty, dep habarlaıdy BBC.

Ýkraına basshysy bul máselege qatysty depýtattar men halyqaralyq seriktesterden usynys kútetinin, sodan keıin saılaý ótkizýge daıyn bolatynyn jetkizdi.

— Bul máseleni búginde AQSh prezıdenti kóterip otyrǵandyqtan, men qysqasha jaýap beremin, men saılaýǵa daıynmyn. Onyń ústine, qazir AQSh-tan, qajet bolsa eýropalyq áriptestermen birlesip, saılaý ótkizý úshin qaýipsizdikti qamtamasyz etýge kómektesýin suraımyn. Eger qaýipsizdik qamtamasyz etilse, onda aldaǵy 60–90 kún ishinde Ýkraına saılaý ótkizýge daıyn bolady, — dedi Vladımır Zelenskıı.

Sondaı-aq ol beıbitshilik josparyna qatysty úsh qujattyń mazmunyn ashyp aıtty.

— 20 tarmaqtan turatyn negizdemelik qujat bar. Ol únemi ózgerip otyrady, bul qalypty jaǵdaı. Bul Ýkraına, Eýropa jáne búkil álemniń múddelerine saı bolýy tıis tiri qurylym, — dedi Ýkraına prezıdenti.

Onyń aıtýynsha, ekinshi qujat qaýipsizdik kepildikterine arnalǵan, al úshinshi qujat Ýkraınany qalpyna keltirý máselelerin qamtıdy.

Eske sala keteıik, AQSh-tyń burynǵy prezıdenti Donald Tramp qaqtyǵys jalǵasyp jatqanyna qaramastan, Ýkraınada jańa prezıdenttik saılaý ótkizetin ýaqyt keldi dep málimdegen bolatyn.