Vladımır Zelenskıı gýmanıtarlyq kómek úshin Qazaqstanǵa alǵys aıtty

ASTANA. QazAqparat – Ýkraına Prezıdenti Vladımır Zelenskıı óz eline kórsetilgen gýmanıtarlyq kómek úshin Qazaqstanǵa alǵys aıtty, dep habarlaıdy QazAqparat.

«Men Qazaqstan Prezıdenti Qasym-Jomart Toqaevpen telefon arqyly sóılestim. Biz halyqaralyq alańda yqpaldastyq máselesin talqyladyq. Sondaı-aq men Ýkraınaǵa gýmanıtarlyq kómek úshin Qazaqstanǵa alǵys bildirdim», - dep jazdy Vladımır Zelenskıı Telegram-daǵy jeke kanalynda.

Búgin Ýkraına tarapynyń bastamasymen Qasym-Jomart Toqaev Vladımır Zelenskıımen telefon arqyly sóıleskenin buǵan deıin habarlaǵan bolatynbyz.

«Eki el basshylary Qazaqstan men Ýkraına arasyndaǵy gýmanıtarlyq baılanystar máselesin talqylady.

Qasym-Jomart Toqaev Reseı men Ýkraına arasyndaǵy qarýly qaqtyǵysty BUU Jarǵysy men jalpyǵa ortaq halyqaralyq quqyq normalary negizinde dıplomatııalyq jolmen sheshýge qatysty Qazaqstannyń ustanymyn rastady», - delingen Aqorda málimetinde.