Vladımır Tolokonnıkovpen qoshtasý dúısenbi kúni Almatyda ótedi
ALMATY. QazAqparat - Dúısenbi, 17 shilde kúni Almatyda akter Vladımır Tolokonnıkovpen qoshtasý rásimi ótedi, dep habarlaıdy QazAqparat tilshisi qalalyq Mádenıet basqarmasyna silteme jasap.
Óner ıesine arnalǵan qoshtasý rásimi Lermontov atyndaǵy memlekettik akademııalyq orys drama teatrynda ótedi.
V.Tolokonnıkovtyń týystarynyń qalaýymen akter Reseıde Troekýrovsk zıratyna jerlenedi. Onymen qoshtasý rásimi Máskeýdegi Kıno úıinde ótedi.
«Óner jolynda - 45 jyl, kınoda - ondaǵan rólder, teatr sahnasyndaǵy umytylmas obrazdar, únemi kórermenniń yqylasyna bólený. Munyń bári -aq adamǵa - Vladımır Tolokonnıkovke qatysty. Ataqty akterdiń jatqan jeri jaıly bolsyn», - dep atap ótti basqarmanyń baspasóz qyzmetinen.
Eske salaıyq, Qazaqstannyń eńbek sińirgen ártisi uzaq aýrýdan keıin búgin túnde Máskeýde qaıtys boldy.
Qaıǵyly habardy Reseı ártisteriniń gastrolin uıymdastyrýshy Konstantın Haralampıdıs habarlady.
Keıinirek bul aqpardy «Qazaqfılm» baspasóz hatshysy Dmıtrıı Shıshkın rastady.
«Qaıǵyly jańalyq. Búgin túnde uzaq syrqattan keıin Vladımır Tolokonnıkov qaıtys boldy. Qazir ony aqtyq saparǵa shyǵaryp salý jumystarymen marqumnyń dosy, rejısser Konstantın Haralampıdıs aınalysyp jatyr. Ázirge naqty aqparat joq, biraq qoshtasý rásimi seısenbi kúni Máskeýdegi Kıno úıinde ótedi dep kútilýde. Al denesi Troekýrovsk zıratyna jerlenedi. Elimizdiń talantty ártisteriniń biriniń jatqan jeri jaıly bolsyn", - dedi Dmıtrıı Shıshkın.
