Vladımır Pýtın UQShU aıasynda birlesip atqarý qajet baǵyttardy atady

BІShKEK. QazAqparat – Reseı Prezıdenti Vladımır Pýtın UQShU aıasynda birlesip atqarýdy qajet etetin baǵyttardy atady, dep habarlaıdy QazAqparat tilshisi.

«Biz seriktesterimizben halyqaralyq lańkestik jáne ekstremızmmen kúres salasynda ózara is-qımyldy nyǵaıtýǵa umtylamyz. UQShU keńistiginde halyqaralyq lańkestik toptardy anyqtaý men joıý boıynsha birlesken operatsııalar tájirıbesin jalǵastyrýdy durys dep sanaımyz. Osy oraıda lańkesterdiń bazalaryna, qarjylandyrý kózderine tosqaýyl qoıýǵa qatysty bolyp otyr. Biz antıterror tájirıbesimen bólisýge daıynbyz», - dedi V. Pýtın Bishkekte UQShU Ujymdyq Qaýipsizdik keńesi sessııasynyń keńeıtilgen quramdaǵy otyrysynda

Onyń sózine qaraǵanda, esirtki zattarynyń zańsyz aınalymyna qarsy is-qımyl boıynsha UQShU qyzmetin jandandyrý basymdyqty maqsat bolyp otyr.

«Osy turǵyda 2021-2025 jyldar kezeńine UQShU-nyń esirtkige qarsy jańa strategııasyna bastamashy bolýǵa nıettimiz. Bul strategııa esirtkini óndirý men saýdalaýǵa tosqaýyl boıynsha, sondaı-aq osy oraıda shekaralyq rejimdi kúsheıtý aıasynda naqty sharalardy qamtıdy. Bizdińshe, UQShU-nyń bitimgershilik áleýetin óristetýge qatysty, bitimgerlik kúshterdiń joǵary daıarlyǵyn qoldaý máseleleri aıryqsha kóńil bólýdi qajet etedi», - dedi RF basshysy.

«UQShU bólimshelerine BUU aıasynda bitimgerlik operatsııalaryna qatysýǵa múmkindik beretin normatıvtik-quqyqtyq jáne uıymdastyrýshylyq qujattardy ázirleýdi jalǵastyrýdy usynamyz», - dedi Vladımır Pýtın.

Budan buryn habarlanǵandaı, Ujymdyq Qaýipsizdik Shart Uıymyndaǵy tóraǵalyq Qyrǵyzstannan Reseıge ótti.