Vladımır Pýtın prezıdenttik saılaýǵa túsýi múmkin ekenin aıtty
MÁSKEÝ. QazAqparat – Reseı Federatsııasynyń Prezıdenti Vladımır Pýtın el Konstıtýtsııasyna tıisti ózgertýler engizilgen jaǵdaıda prezıdentikke jańa merzimge óz kandıdatýrasyn usynatynyn joqqa shyǵarmady. Ol bul týraly «Rossııa-1» telearnasynda kórsetilgen «Reseı. Kreml. Pýtın» fılmi úshin bergen suhbatta aıtty, dep habarlaıdy QazAqparat TASS agenttigine silteme jasap.
«Ózim úshin áli sheshim qabyldamadym. Eger Konstıtýtsııada múmkindik jasalsa, saılaýǵa túsýim týraly yqtımaldylyqty joqqa shyǵarmaımyn. Ony aldaǵy ýaqyt kórsetedi», - dedi ol.
Bul rette, V.Pýtın sheneýnikterge onyń izin basatyn adamdy qazirden izdep ketpeı, óz jumystarymen aınalysýdy eskertti. «Іzbasardy izdeýmen emes, jumyspen aınalysý qajet», - dedi RF basshysy.
Reseı Prezıdenti Konstıtýtsııaǵa ózgeris engizý usynysy óte oryndy ekenine senimdi.
«Qoldanystaǵy Konstıtýtsııaǵa túzetýler qabyldap jatqanymyz óte durys ekenine kámil senemin», - degen ol, sońǵy aılardaǵy oqıǵalar soǵan dálel bola alatynyn aıtyp ótti.
«Qazirgi Konstıtýtsııa erekshe kezeńde – tankiler parlamentke oq jaýdyryp, Máskeýde qaqtyǵystar bolyp jatqan, ótkir ishkisaıası daǵdarys jaǵdaıynda qabyldandy», - dep eske saldy ol.
