Vladımır Pýtın Mınıstrler kabınetin saılaýǵa deıin aýystyrý durys bolmaıdy dep sanaıdy
ASTANA. 30 jeltoqsan. QazAqparat - Reseı Federatsııasynyń Premer-mınıstri Vladımır Pýtın 2012 jylǵy prezıdent saılaýyna deıin úkimette aýys-túıister jasaý qajetsiz dep otyr, dep habarlaıdy RBK.
"Aýys-túıisterdi jasaýǵa da, jasamaýǵa da bolady. Biraq, dál qazir onyń qajeti joq. Durysy, muny prezıdent saılaýynan keıin, Úkimet quramy jańarǵannan soń júzege asyrǵan jón bolady " - dedi ol.
Premer saılaýdan soń Úkimetti tutastaı qalyptastyryp, «halyqqa aldaǵy josparlardy qandaı adamdardyń júzege asyratyndyǵyn sol kezde kórsetý kerek», - dedi.
Aldaǵy prezıdent saılaýy jaıly sóz ete kele, V.Pýtın, saılaýǵa qatysý máselesi boıynsha RF Prezıdenti Dmıtrıı Medvedev ekeýiniń birigip sheshim qabyldaıtyndyqtary jóninde sóz etti.
"Biz áli bul týraly oılanamyz. Ázirge naqty túıin jasaýǵa erte. Áıtpese, saılaý týraly sóz qozǵaı bastasań, bári bir ózgeris kútip, jumys istemeı qoıady", - dedi óz sózinde premer.
