Vladımır Pýtın Qazaqstandaǵy ushaq apatyna baılanysty kóńil aıtty
NUR-SULTAN. QazAqparat – Reseı Federatsııasynyń Prezıdenti QR Prezıdenti Qasym-Jomart Toqaevqa Almaty mańynda bolǵan áýe apatyna baılanysty kóńil aıtý jedelhatyn joldady, dep habarlaıdy QazAqparat RF Prezıdentiniń baspasóz qyzmetine silteme jasap.
«Reseı halqy ushaq apatynan qaza bolǵandardyń týǵan-týystarynyń qaıǵylaryna ortaqtasady. Qaıǵyly apattan zardap shekken jandardyń tezirek saýyǵyp ketýin tileıdi», – delingen Reseı memleketi basshysynyń jedelhatynda.
Aıta keteıik, búgin tańda Almatydan Nur-Sultan qalasyna ushyp shyqqan ushaq radardan joǵalyp ketti.
Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy. Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa ushyp shyqty. Osy apatqa qatysty shuǵyl jeli iske qosylǵan.
QR Prezıdenti Qasym-Jomart Toqaev ushaq apatyna kináliler zańǵa sáıkes qatań jazalanatynyn málimdedi. Elbasy Nur-Sultan Nazarbaev jolaýshylar ushaǵynyń apatqa ushyraýyna baılanysty kóńil aıtty.
