Vladımır Pýtın Qazaqstan men Reseıdiń ortaq maqsatyn atady
ASTANA. KAZINFORM — Qos eldiń qarym-qatynasy óte jaqsy damyp kele jatyr. Bul jóninde Reseı Prezıdenti Vladımır Pýtın Peterbýrg halyqaralyq ekonomıkalyq forýmy aıasynda halyqaralyq agenttikterdiń ókilderimen kezdesýde málimdedi.
Jıynda QR Prezıdenti teleradıokesheniniń bas dırektory Raýshan Qajybaeva Vladımır Pýtınniń jýyrda Qazaqstanǵa jasaǵan memlekettik saparyn eske saldy. Astanada Qasym-Jomart Toqaev pen Vladımır Pýtın «Qazaqstan men Reseı halyqtarynyń dostyǵy men tatý kórshiliginiń jeti negizi týraly» birlesken málimdemege qol qoıǵan edi. Raýshan Qajybaeva Reseı Prezıdentinen bul qujattyń mańyzy jóninde surady.
– Bizdiń Qazaqstanmen qarym-qatynasymyz óte jaqsy damyp kele jatyr. Biz ár másele boıynsha qyzý pikirtalasqa túsemiz. Qarjy nemese óndiris qatynastary, ınvestıtsııalyq qyzmetterdiń sharttary, iri jobalar jóninde kózqaras alýandyǵy bolady. Biraq eki jaq ta árdaıym ortaq mámilege kelýge múddeli. Qos taraptyń da kóńili tolatyn ǵana emes, sondaı-aq, ortaq maqsattarǵa jetkizetin birlesken sheshimder qabyldaýǵa umtylamyz. Al ortaq maqsat jalǵyz – damý jáne Qazaqstan men Reseı azamattarynyń ál-aýqatyn arttyrý, – dedi Vladımır Pýtın.
Sonymen qatar, ol yntymaqtastyqtyń birqatar artyqshylyǵyn atap ótti.
– Bizdi birneshe ǵasyrlyq ortaq tarıh baılanystyrady. Qarym-qatynasymyzda bir memlekettiń quramynda bolǵan kezderden bastap belgili artyqshylyqtarymyz bar. Olar – seriktestik, eń aldymen, biryńǵaı kólik baılanystary. Siz oryssha suraq qoıdyńyz. Ol úshin alǵys aıtamyn. Bul da ekonomıkalyq ólshemsharttar turǵysynan mańyzdy. Sebebi, bir-birimizdi túsinemiz, – dedi Reseı Prezıdenti.
Aıta keteıik, buǵan deıin Toqaev pen Pýtın tatý kórshiliktiń jeti negizi jóninde, AES-ke qatysty qujattarǵa qol qoıǵanyn jazǵanbyz.
