Vladımır Pýtın eýrazııalyq kólik dálizin birlesip qurýǵa shaqyrdy
NUR-SULTAN. QazAqparat - Eýrazııa ekonomıkalyq odaǵy ózge eldermen seriktestikke ashyq. Bul jaıynda Sochıde ótip jatqan «Valdaı» Halyqaralyq pikirtalas klýbynyń jylsaıynǵy XVI otyrysynda Reseı Prezıdenti Vladımır Pýtın aıtty, dep habarlaıdy QazAqparat tilshisi.
«Azııa óz ornyna qaıta oralyp kele jatyr. Azııa elderiniń barlyq, ásirese ekonomıka salasyndaǵy pozıtsııasynyń nyǵaıýy aıtarlyqtaı baıqalady. Qazirdiń ózinde óńirde álemdik jalpy ishki ónimniń úshten biri qalyptasyp otyr. Búginde jahandyq problemalardy Azııanyń qatysýynsyz sheshý múmkin emes. Kóp jaǵdaıda Azııa memleketteriniń arqasynda álem shyn máninde kóppolıarly, barynsha kúrdeli bola tústi. Jahandanýdyń, tehnologııalyq revolıýtsııanyń paıdasyn tıimdi ári aqylǵa qonymdy paıdalanyp, ekonomıkalyq kóshbasshylardyń qataryna qosylý arqyly Azııa memleketteriniń álemniń saıasatta barynsha mańyzdy rólge umtylýy - zańdylyq. Bul - túbegeıli tabıǵı protsess», - dedi Reseı Prezıdenti.
Vladımır Pýtın forým qatysýshylaryn birlese otyryp, eýrazııalyq kólik dálizin qalyptastyrý jaıyn oılanýǵa shaqyrdy. Sonymen qatar Reseı tranzıttik baǵdarlardy belsendi damytýǵa daıyn ekenin bildirdi.
«Birlesken jalpy progrestiń dál osy ustanymdaryn basshylyqqa ala otyryp, biz seriktesterimizben birge Eýrazııalyq ekonomıkalyq odaqty quryp jatyrmyz. Bul ıntegratsııalyq birlestik teń quqylyq, pragmatızm jáne bir-biriniń múddesin eskerýge negizdelgen. Buǵan qosa, bizdiń odaq jabyq naryq emes», - dedi Reseı Prezıdenti.
Aıta keteıik, «Álemdik qurylym: Shyǵystan kózqaras» taqyrybymen ótip jatqan «Valdaı» Halyqaralyq pikirtalas klýbynyń XVI otyrysyna Qazaqstan Prezıdenti Qasym-Jomart Toqaev, Iordanııa koroli Abdalla II, Ázerbaıjan Prezıdenti Ilham Álıev jáne Fılıppın Prezıdenti Rodrıgo Dýterte qatysty.
