Vladımır Pýtın Astanaǵa keldi
ASTANA. KAZINFORM – Reseı Federatsııasynyń Prezıdenti Vladımır Pýtın memlekettik saparmen Qazaqstanǵa keldi. Astana áýejaıynda Vladımır Pýtındi Memleket basshysy Qasym-Jomart Toqaev jeke ózi qarsy aldy.
QR Áýe qorǵanysy kúshteri Reseı prezıdenti ushaǵyn el shekarasynan kútip alyp, Astana áýejaıyna deıin súıemeldep ákeldi.
Memlekettik sapar hattamasyna sáıkes, trap aldynda Qurmet qaraýyly sap túzedi.
Jas órender Qazaqstan men Reseıdiń jalaýshalaryn jelbiretip, qoshemet kórsetti.
Elordanyń Oqýshylar saraıynyń ónerpazdary Qurmanǵazynyń «Adaı», «Balbyraýyn» kúılerin, orys halyq shyǵarmalaryn oryndady.
Reseı Prezıdenti quramynda 30-dan astam adam bar úlken delegatsııamen keldi. Olardyń qatarynda mınıstrler men iri kompanııalardyń basshylary bar.
Eske sala ketsek, 27-29 mamyr kúnderi Reseı Federatsııasy Prezıdenti Vladımır Pýtınniń Qazaqstanǵa memlekettik sapary ótedi. Memleketter basshylary bul saparda Qazaqstan men Reseı arasyndaǵy jan-jaqty strategııalyq seriktestiktiń jáne odaqtastyq qatynastardyń qazirgi jaı-kúıin, sondaı-aq ony nyǵaıtý perspektıvasyn talqylaıdy.
28 mamyrda Eýrazııalyq ekonomıkalyq odaqqa múshe memleketter basshylaryny qatysýymen Eýrazııalyq ekonomıkalyq forým ótedi. Al 29 mamyrda Joǵary Eýrazııalyq keńestiń otyrysy uıymdastyrylady.
Áýejaı termınalynda ál-Farabı atyndaǵy Oqýshylar saraıynyń dombyrashylar ansambli jáne syrnaıshy, halyqaralyq konkýrstardyń laýreaty Radmır Haıbýllın Reseı memleketi basshysynyń qurmetine Qurmanǵazy kúıleri men orys halyq áýenderinen popýrrı oryndady.
Búgin «Egemen Qazaqstan» gazetinde RF Prezıdenti Vladımır Pýtınniń maqalasy jarııalanǵan edi. V.Pýtın eki eldiń barlyq saladaǵy ózara tıimdi baılanystaryn bekemdeı túsýge múddeli ekenin aıtyp, ósip-órkendeý jolyna túsken Qazaqstanǵa reseılikterdiń qurmeti erekshe ekenin jetkizdi.
Reseılik ınvestorlar Qazaqstan ekonomıkasyna 30 mlrd dollar qarajat quıǵan.
Buǵan deıin Kazinform tilshisi eki el arasyndaǵy yntymaqtastyqtyń qazirgi damý úrdisteri men aldaǵy perspektıvasyna sholý jasaǵan edi.
