Vladımır Nabokovtyń uly - Dmıtrıı dúnıeden ótti
ASTANA. 25 aqpan. QazAqparat - Vladımır Nabokov pen Vera Slonımniń jalǵyz uly - Dmıtrıı 78-ge qaraǵan jasynda Shveıtsarııada dúnıeden ótti, dep habarlady ITAR-TASS.
Dmıtrıı Nabokov 1934 jyly 10 mamyrda Berlınde dúnıege keldi. Ol opera ánshsi boldy, sondaı-aq aýdarmamen, sonyń ishinde ákesiniń mátinderin aýdarýmen aınalysty jáne olardy bastyrdy.
Naq osy Dmıtrıı Nabokov biraz tolǵanyp, aqyry Vladımır Nabokovtyń sońǵy aıaqtalmaǵan «Laýra jáne onyń túpnusqasy» romanyn jarııalaýǵa sheshti. 1977 jyly qaıtys bolǵan jazýshy jazbalaryn órteýge ósıet etken bolatyn, biraq bul tilek oryndalmady. Kitap 2009 jyly qarashada jaryqqa shyqty. Keıinnen qoljazba aýktsıonǵa qoıylǵanmen, ony satýdyń reti kelmedi.
Onyń ákesi Vladımır Nabokov (1899-1977) - orys jáne amerıkan jazýshysy, aqyn, aýdarmashy, ádebıettanýshy. Kezinde ol Nobel syılyǵyna da usynylǵan, biraq berilgen joq. Sankt-Peterborda V.Nabokovtyń murajaı-úıi bar.
Dmıtrıı Nabokovtan tikeleı muragerler qalǵan joq, dep atap ótedi agenttik.
