Vladımır Gazzaev «Aqtóbe» FK bas bapkeri qyzmetinen ketti
ASTANA. QazAqparat - Búgin Aqtóbe oblysynyń ákimi Arhımed Muhambetov pen reseılik maman Vladımır Gazzaev kezdesti, dep jazdy Sports.kz.
Kezdesý nátıjesi boıynsha Vladımır Gazzaevtyń bas bapker qyzmetinen ketý týraly ótinishi qanaǵattandyryldy.
Eske salsaq, 37 jastaǵy reseılik maman bir jyl buryn «Aqtóbege» bas bapker bolyp taǵaıyndalǵan. Osy kezeńde komanda chempıonatta kúmis júldege qol jetkizip, Qazaqstan Kýbogynyń fınalyna shyqqan.
Bıylǵy chempıonatta osy mamannyń basshylyǵymen «Aqtóbe» qatarynan 19 týrda birde-bir ret utylǵan joq. Týrnırlik kestede aqtóbelikter top bastap tur. Alaıda Eýropa lıgasynda áli aty shyǵa qoımaǵan ortańqol ujym sanalatyn estondyq «Nymme Kalıý» klýbynan asyp óte almady.
Qazir bas bapkerdiń mindetin atqarýshy - Alekseı Kosolapov.
