Vladımır Chepel: Ákem — orys, anam — tatar, al men — qazaqpyn
«Men dúnıege kelgende anamda sút bolmady. Perzenthanada eki kún buryn bosanǵan qazaq áıeli meni emizip, ana sútin berdi. Mine, sol sátten bastap qazaqtyń qany boıyma darydy desem artyq aıtqanym emes.
Qazaq tili maǵan ana sútimen darydy.
Ultym orys bolǵanmen, men - qazaqpyn. Orys tiline qaraǵanda, qazaq tilin jaqsy bilemin. Aýylda óskendikten dostarymnyń barlyǵy qazaq balalary boldy. Sondyqtan ortam qazaq, ózim de qazaqpyn», - dedi Vladımır Chepel.
Qazaq tilin erkin meńgergen Vladımır qazir Qapal aýylyndaǵy ákimdikte qyzmet etedi. Onyń ákim apparatynyń bas mamany bolyp jumys istegenine 8 jyldan asypty.
«Memlekettik qyzmetten bólek bos ýaqytymda sportpen shuǵyldanamyn. Qol kúresten sport sheberine úmitkermin. Talaı jarystarda top jardym. 2019 jyly Almaty oblysynyń «Úzdik jas Memlekettik qyzmetshisi» ataǵyna ıe boldym. 2020 jyly Prezıdenttiń Jarlyǵymen «Eren eńbegi» úshin medalimen marapattaldym», - dedi belsendi jas.
Vladımır Chepel qazaq tilinde erkin, ári taza sóıleıtindigin maqtan kórmeıdi.
«Sebebi memlekettik tildi bilý Qazaqstannyń ár azamatynyń boryshy dep sanaımyn. Biz - bir shańyraq astynda tatý-tátti ǵumyr keship jatqan elmiz.
Meniń anam - tatar, ákem - orys, ózim - qazaqpyn. Qazaqtyń sary domalaq balasymyn. Sondyqtan elime, jerime qurmet kórsetip, patrıoty bolý mindetim dep sanaımyn»,- dedi Vladımır Chepel.
Belsendi jas áli boıdaq. Bolashaq jaryn kezdestirmepti.
«Bolashaq jarymnyń, eń bastysy, adamı qasıeti basym bolsa dep tileımin. Ár dúnıeniń qadirin bilip, jan-jaqty bolǵanyn qalaımyn. Áke-sheshemdi syılap, qurmettep tursa boldy. Bastysy bereke-birligimiz ajyramasyn. Qazaq elimniń bereke-birligi, yntymaǵy nyǵaıa bersin. Barsha halqymdy birlik kúnimen shyn júrekten quttyqtaımyn. El irgesi bútin, halqymyz aman, beıbit zaman bolsyn», - dep tiledi Vladımır Chepel.
