Vladımır Bojko Shyǵys Qazaqstan oblysyndaǵy sý basý oqıǵalaryna pikir bildirdi
ASTANA. QazAqparat - QR Parlamenti Májilisi tóraǵasynyń orynbasary Vladımır Bojko Shyǵys Qazaqstan oblysyndaǵy tasqyn sýmen kúres jumystaryna pikir bildirdi, dep habarlaıdy QazAqparat.
«Sharalar qabyldanyp jatyr. Túsinesizder me, Shyǵys Qazaqstan oblysyna bir aılyq norma túskennen keıin, árıne, batady. (...) Sizder sý býlanyp ketedi dep oılaısyzdar ma?! Joq, ol bir jaqqa qaraı aǵýy tıis. Jáne bul qaıtalana beredi (jyl saıyn - avt), úmittenbeńizder. Sizder Aıda turatyn sııaqtysyzdar», - dedi ol Májilistegi Úkimet saǵatynan keıin BAQ ókilderine bergen suhbatynda.
Sonymen qatar ol tilshilerge qolaısyz aýa raıymen kúreske baǵyttalǵan memlekettik sharalarǵa da nazar aýdarýǵa keńes berdi.
«Qaıta qarjylandyrý jasalyp, bógetter salynýda, joldar bekitilýde, tehnıkalar damytylýda - osylarǵa nege kóz juma qaraısyzdar?! Keshe ahýal qıyndap ketkennen keıin motopompalardy ushaqpen jekizdi», - dedi ol.
Vladımır Bojko aýa raıyn aldyn ala dóp basý qıyn ekendigin basa aıtty.
«Bul tabıǵat qoı. Sońǵy 2 jyldyń ishinde qansha bóget jóndelgenin qarańyzdar. Qyzylaǵash (2010 jyldyń 11 naýryzynda bóget buzylyp, 43 adam qaza tapqan edi) oqıǵasy bizge jaqsy sabaq boldy. Sizder qalasańyzdar da, qalamasańyzdar da sý tasqyny boldy - bola da beredi, jańbyrlar buǵan deıin de boldy - bola da beredi. Eskertý júıesiniń qalaı tıimdi jumys isteı bastaǵanyn qarańyzdar. Problemalar boldy, bar, bolady da. Munyń barlyǵyn barynsha tómendetý úshin jekelegen azamat, aýdan deńgeıinde qandaı sharalar qabyldaý qajettigimiz bul basqa másele», - dedi Májilis tóraǵasynyń orynbasary.
