Vladımır Bojko: Pedagogqa dórekilik bildirgender bes táýlikke qamalýy múmkin
QARAǴANDY. QazAqparat - QR Parlamenti Májilisi tóraǵasynyń orynbasary Vladımır Bojko E. Bóketov atyndaǵy QarMÝ fakýltetteriniń dekandarymen kezdesti. Ol «Pedagog mártebesi týraly» jańa zań jobasyn túsindirdi, daryndy jastardy qoldaý sharalary týraly aıtyp, suraqtarǵa jaýap berdi, dep habarlaıdy QazAqparat tilshisi.
Ótken jyldyń 30 jeltoqsanynda Qasym-Jomart Toqaev «Pedagog mártebesi týraly» Zańǵa qol qoıdy. Ol muǵalimderdiń ómirine jáne mamandyqtyń bedeline qalaı áser etetini týraly qaraǵandylyq oqytýshylarǵa Vladımır Bojko aıtyp berdi.
«Bizge muǵalimderdi qoldaý men qorǵaýdyń mańyzdy sharalary qajet. Qazir statıstıka boıynsha, 1700 «altyn belgi» ıeleriniń tek 20-sy ǵana pedagog mamandyǵyn meńgerýge barady. Bul óte az jáne mamandyq bedeliniń tómendegenin kórsetedi. Jaǵdaıdy túzetý úshin biz muǵalimderge júktemeni 2020 jyldyń 1 qyrkúıeginen bastap aptasyna 18 saǵattan 16 saǵatqa deıin tómendetemiz. Magıstr dárejesi úshin 10 AEK mólsherinde qosymsha aqy qarastyrylǵan, bul – 25 500 teńge. Qosymsha tólemder olımpıada men konkýrstardyń jeńimpazdary men júldegerlerin daıyndaǵan pedagogtarǵa, sondaı-aq synyp jetekshiligi, dápterlerdi teksergeni jáne basqa da jumysy úshin tólenedi», - dedi ol.
Vladımır Bojko jańa zańda qarastyrylǵan aıyppuldarǵa toqtaldy. Budan bylaı pedagogtardy qadirlemeı dórekilik bildirgender ákimshilik jaýapkershilikke tartylady. Muǵalimniń atyna bylapyt sóıleý, ádepsiz minez-qulyq, ádepsiz áreketterdi kórsetkeni úshin jeke tulǵalar 20-dan 30 AEK-ke deıin (79 530 teńgege deıin) aıyppul tóleıdi. Eger muǵalimdi 12 den 16 jasqa deıingi jasóspirimder renjitken bolsa, onyń ata-analaryna 20 AEK (53 000 teńge) aıyppul salynady. Dórekilik qarym-qatynas qaıtalanatyn bolsa, jaýapkershilik odan da qatańyraq bolady – bes táýlikke deıin qamaýǵa alynýy múmkin.
Sondaı-aq, Vladımır Bojko daryndy jastardy qoldaý sharalary týraly aıtty. Atap aıtqanda, «El úmiti» baǵdarlamasy aıasynda aýyldaǵy daryndy balalarǵa kómek kórsetiletin bolady. Endi baıqaýlar men olımpıadalardyń jeńimpazdary jeke kvota boıynsha NZM jáne basqa da mamandandyrylǵan mektepterge túse alady. Jaqyn arada daryndy balalarǵa arnalǵan onlaın-mektep pen Elbasy akademııasy jumys isteı bastaıdy.
Depýtat sondaı-aq jastardyń elden kóship ketý máselesine toqtaldy. Onyń aıtýynsha, JOO-lar kásiptik baǵdar boıynsha belsendi jumys júrgizbeıdi, sonyń nátıjesinde talapkerler shetel JOO-laryn jıi tańdaıdy.
Kezdesý sońynda ol pedagogtardyń suraqtaryna jaýap berdi. Qoıylǵan saýaldar ǵylymı salany qarjylandyrýǵa jáne bilim berý granttarynyń mólsherin arttyrýǵa qatysty boldy.
