Vladımır Bojko Májilis depýtattarynyń jumysy týraly aıtty

ALMATY. QazAqparat - QR Parlamenti Májilisi tóraǵasynyń orynbasary Vladımır Bojko Qazaqstan halqy Assambleıasy basshylarymen, aktıvimen kezdesti, dep habarlaıdy QazAqparat tilshisi.

Kezdesý barysynda Bojko Assambleıadan saılanǵan Májilis depýtattarynyń jumysymen tanystyrdy.

«6 sáýirde Parlamentte Assambleıadan (9) jáne ózge de partııalardan usynylǵan (22) depýtattardyń toby quryldy. 1 qyrkúıekten bastap top Parlamenttiń 4 birikken otyrysyna qatysty. Sondaı-aq, zań qabyldanatyn 28 plenarlyq otyrysqa, 11 úkimettik saǵatqa,  turaqty komıtetterdiń 206 jıynyna at salysty.

Atalǵan depýtattyq top músheleri 1 394 túzetý men usynys engizdi. Jıyndarǵa naǵyz óz isiniń mamandary - sarapshylardy tartamyz. Komıtet músheleri Konstıtýtsııaǵa enetin ózgeristerdi talqylady. Óńirlerge baryp, 1 109 ret azamattardy qabyldady. Top músheleri 65 depýtattyq saýal joldady. Assambleıadan usynylǵan depýtattar 16 saýal berdi»,- dedi Vladımır Bojko.

Jıyn barysynda Memleket basshysy Nursultan Nazarbaevtyń «Bolashaqqa baǵdar: qoǵamdyq oı-sanany jańǵyrtý» maqalasy talqylandy.

Májilis depýtaty Qazaqstannyń  mádenıeti men tarıhyndaǵy mol murany keler urpaqqa jetkizý máselesiniń mańyzdylyǵyn tilge tıek etti.

«Qoǵamdyq sana máselesi óte mańyzdy. Buryn bireýde qaıǵy bolsa, oǵan barlyǵy kómektesetin. Qazir kópshiligi túk bolmaǵandaı qasynan ótip ketedi. Naǵyz patrıotızm sezimin nasıhattap, otbasy ınstıtýtyn, úlkenderge qurmetti saqtap qalýymyz kerek. Jastar nege klassıkalyq mýzykany unatpaıdy? Sebebi, mektep oqýshylarynyń kópshiligi klassıkalyq kontsertterge barmaıdy. Teatrlarǵa da eshkim barmaıdy. Bizdiń basty - maqsatymyz jastardy barynsha rýhanı qundylyqtarǵa baýlý», - dedi Bojko.

Kezdesý sońynda Parlament Májilisi tóraǵasynyń orynbasary Assambleıadan usynylǵan depýtattyq toptyń jumysyn jaqsartý boıynsha jınalǵandardyń usynystary men tilekterin  qabyldady.