Vladımır Bojko ınternette ózi týraly jazylǵan pikirlerge jaýap berdi
«Eki kúnniń ishinde áleýmettik jeliler men jańalyqtarda aýyl sharýashylyǵy eńbekkerlerin meniń jábirlegenim týraly aıyptaýlardy oqydym. Osy oraıda keıbireýler maǵan qatysty tikeleı ádepsiz sózder aıtqan»,-dep toqtaldy Bojko Májiliste tilshilerge bergen suhbatynda. Alaıda ol til tıgizgen adamdardy sotqa berýge nıetti emes ekenin aıtty.
«Men olardyń ádisin bilemin, ıaǵnı bul adamdar ózderine jarnama jasaý maqsatynda bireýlerdi qaralaýǵa sheber»,-deıdi ol.
Atalǵan máselege baılanysty V. Bojko Parlament saıtyndaǵy onyń baıandamasy men «Kazahstanskaıa pravda», «Lıter», «Egemen Qazaqstan» gazetterinde jarııalanǵan obektıvti materıaldardy oqyp shyǵýǵa keńes berdi.
«Men aýyl jastarynyń qalaǵa tartylýyna tyıym salý kerek dep aıtqan joqpyn. Bul turǵyda jastardy aýyldan ketýge ıtermeleıtin ahýaldy týyndatpas úshin, óńirlerde qajetti jaǵdaı jasaý kerektigin sóz ettim. Osy oraıda mádenı máselelerdi sheship, aýyldarda ómir súrý sapasyn joǵarylatý maqsatynda jalaqysy laıyqty deńgeıdegi jumys oryndaryn qurý, ınfraqurylymdy retke keltirý máselelerin kótergen edim. Ózderińiz bilesizder, eshbir turǵyn Saýerden (Aqmola oblysyndaǵy «Rodına» agrarlyq fırmasynyń dırektory) jáne «Rodınadan» ketip jatqan joq, sebebi ol jerde barlyq máseleler sheshilgen jáne osyndaı jaǵdaı barlyq óńirde bolýy tıis»,-dep túsindirdi depýtat.
Munymen qosa V. Bojko áleýmettik jelilerde onyń otstavkaǵa ketýi týraly usynystardy qalaı qabyldaǵanyn aıtyp berdi.
«Keı kezderde ádepsiz azamattyń, sonymen qatar jelide óziniń aty-jónin kórsetpeı jasyryn otyratyn paıdalanýshylar til tıgize bastaǵany qynjyltady. Árıne, bul jaǵdaı maǵan aýyr tıdi. Internette aýqymdy aýdıtorııany paıdalanatyn kórgensizdeý azamattarǵa osylaı áreket etýge tıisti túrde jol bermeıtin kezeń alys emes degen oıdamyn»,-dep túıindedi sózin Bojko.