Vladımır Bojko Indonezııa delegatsııasymen kezdesti
ASTANA. QazAqparat - Búgin Májiliste Palata tóraǵasynyń orynbasary Vladımır Bojko Indonezııa Respýblıkasy Ókilder palatasy Tóraǵasynyń orynbasary Ýtýt Adıanto bastaǵan delegatsııamen kezdesti, dep habarlaıdy Májilistiń baspasóz qyzmeti.
Júzdesýde vıtse-spıker V. Bojko eki el kóshbasshylarynyń memlekettik saparlary bizdiń elderimizdiń yntymaqtastyǵynyń nyǵaıýyna serpin bergenin atap ótip, halyqaralyq máselelerde Qazaqstan men Indonezııa elderiniń ózara uqsas ustanymdaryna toqtaldy. Sondaı-aq, Májilis tóraǵasynyń orynbasary ındonezııalyq áriptesterin aǵymdaǵy jyldyń qazan aıynda parlamentshilerdiń Turǵyn halyq jáne damý jónindegi Azııa forýmynyń qoldaýymen Astana qalasynda ótetin jastarǵa arnalǵan ınvestıtsııalyq forým jumysyna qatysýǵa shaqyrdy. Kezdesý barysynda ekijaqty qarym-qatynastardy odan ári tereńdetip, parlamentaralyq baılanysty arttyrý úshin Palatalardyń beıindi komıtetteri arqyly tyǵyz qarym-qatynas jasaýdyń mańyzdylyǵy týraly aıtyldy. 
Kezdesý barysynda taraptar eki eldiń saýda-ekonomıkalyq qatynasty damytý máselesin de nazardan tys qaldyrmady. Kezdesýge qazaqstandyq taraptan depýtattar Abaı Tasbolatov, Aıqyn Qońyrov, Erlan Barlybaev, Qojahan Jabaǵıev, Mansurhan Mahambetov jáne Sáken Ótebaev qatysty.
Aıta ketý kerek, eki el arasyndaǵy dıplomatııalyq qatynastardyń ornaǵanyna bıyl 25 jyl toldy.
