Vladımır Bojko aqtóbelikterge Prezıdenttiń bes áleýmettik bastamasyn túsindirdi
AQTÓBE. QazAqparat - Májilis depýtattary aqtóbeliktermen kezdesý ótkizip jatyr. Parlament Májilisi tóraǵasynyń orynbasary Vladımır Bojko Áıteke bı jáne Yrǵyz aýdarynyń turǵyndarymen kezdesti, dep habarlaıdy QazAqparat tilshisi.
Aqtóbege jumys saparymen Parlament Májilisi tóraǵasynyń orynbasary Vladımır Bojko keldi. Óńir basshysy Berdibek Saparbaev halyqpen kezdesýge kelgen V.Bojkomen birge Yrǵyz jáne Áıteke bı aýdandaryna bardy. Halyqpen kezdesý kezinde Memleket basshysynyń bes áleýmettik bastamasy túsindirildi.
«Ótken jyly Aqtóbede 790 myń sharshy metr turǵyn úı paıdalanýǵa berildi. Bıyl 850 myń sharshy metr turǵyn úı salýdy josparlap otyrmyz. «Nurly jol» jáne «Nurly jer» memlekettik baǵdarlamalary aıasyndaǵy qurylys belsendi júrip jatyr. Memlekettik-jekeshelik áriptestik aıasynda stýdentterge arnalǵan jataqhanalardyń qurylysy júrgiziledi. Bıznesti damytýǵa qatysty aıtar bolsaq, búginde oblys turǵyndarynyń 32 paıyzy kásippen aınalysady. Áleýmettik mindetterge toqtalsaq, halyqtyń 88 paıyzy gazben qamtamasyz etildi. Ótken jyly oblys ekonomıkasynyń 5 paıyzdyq ósimi tirkeldi», - dedi óńir basshysy Berdibek Saparbaev.
Al Vladımır Bojko el ishinde atqarylyp jatqan isterge toqtalyp, Prezıdenttiń bes áleýmettik bastamasyn aıtyp berdi.
«Birinshi bastama aıasynda qazaqstandyqtar páter qunynyń 20 paıyzyn jınap, 7 paıyzdyq ústeme aqymen nesıe rásimdeı alady. Nesıe 25 jylǵa beriledi. Іri qalalarda nesıe somasy 20-25 mıllıon teńgege deıin, oblystarda 13-16 mıllıon teńge bolady. Al aýyldyq jerlerde 7-8 mıllıon teńgeni quraıdy. Al salyqtyq júktemeni azaıtý jónindegi áleýmettik bastama 6,4 mıllıon qazaqstandyqqa áser etedi. Jergilikti bıýdjetterge bul áser etpeıdi, óıtkeni alynbaǵan túsimder respýblıkalyq bıýdjetten kompensatsııalanady», - dep atap ótti V.Bojko. Ol ustaz bedelin kóterip, bilim granttarynyń sanyn arttyrý men stýdentterdi jataqhanadaǵy oryndarmen qamtamasyz etýdiń tıimdiligin aıtty.
«Kelesi oqý jyly qosymsha 20 myń bilim granty bólinedi. Onyń 16 myńy bakalavrlarǵa, sonyń ishinde 11 myńy tehnıkalyq oqý oryndaryna, 2 myńy aýyl sharýashylyq mamandyqtarǵa bólinedi. Sonymen birge 75 myń stýdenttiń turýy úshin 150 jataqhana salynady dep josparlanyp otyr», - dedi V.Bojko.
Aqtóbe oblysy ákiminiń baspasóz qyzmetiniń habarlaýynsha, kezdesýler Áıteke bı aýdanynyń Qarabutaq jáne Komsomol aýyldarynda ótti. Sonymen qatar, jumys sapary aıasynda Yrǵyz aýylyndaǵy 300 oryndyq mektep-ınternattyń qurylys barysymen tanysty. Keıin TJD-nyń arnaıy tehnıkalaryn qarap shyǵyp, Komsomol aýylyndaǵy sý tasqynynyń aldyn alýǵa arnalǵan jumystardy baǵamdady.
