Vladımır Bekker jylý maýsymy aldynda turǵyndarǵa keńes berdi

NUR-SULTAN. QazAqparat – Bıylǵy kúzde elimizdiń turǵyn úı sektorynda myńnan astam órt tirkeldi, dep habarlaıdy QazAqparat tilshisi.

Bul týraly QR ІІM Tótenshe jaǵdaıdar komıtetiniń tóraǵasy Vladımır Bekker málimdedi.

«Bıylǵy 1 qyrkúıekten bastap turǵyn úı sektorynda 1 148 órt tirkeldi. Onyń saldarynan 20 adam mert bolyp, 34 adam jaraqat aldy, 6 adam órt shyqpaı-aq, ıis tıip kóz jumdy», - dedi V. Bekker elordada Ortalyq kommýnıkatsııalar qyzmetindegi baspasóz máslıhatynda.

Osyǵan baılanysty, TJ komıteti turǵyn úılerde adamdardyń ýly gazdan ólimin boldyrmaý maqsatynda úıdi jylytý erejelerin qatań saqtaýǵa keńes beredi.

«Pesh ústinde jáne oǵan jaqyn jerde otyn, kıim jáne basqa da janǵysh materıaldardy keptirýge bolmaıdy. Qatty sýyqta peshtiń qyzyp ketýine jol bermeńiz, pesh pen onyń aınalasyn muqııat baqylańyz. Murjanyń bitelip qalýy ıis tııýge ákep soǵýy múmkin, ony 3 aıda bir ret tazalaý kerek. Gazǵa qatysty barlyq jumysty bilikti mamandar isteýi kerek. Qandaı da bir aqaý baıqalsa, qazandyqty sóndirip, gaz qyzmetine habarlasyńyz», - dedi V. Bekker.

Buǵan deıin TJ komıtetiniń tóraǵasy turǵyn úıdegi órt qaýipsizdiginiń buzylǵanyna aıyppul salynbaıtynyn eskertti jáne turǵyndarǵa órt qaýipsizdigi týraly tekserý jumystaryna qarsy bolmaýdy ótindi.