Vladımır Bekker «Han-Shatyrdaǵy» bala ólimine qatysty pikir bildirdi
NUR-SULTAN. QazAqparat - Tótenshe jaǵdaılar komıtetiniń tóraǵasy Vladımır Bekker «Han-Shatyr» saýda oıyn-saýyq ortalyǵynda bolǵan qaıǵyly jaǵdaıǵa toqtalyp, ata-analarǵa úndeý tastady, dep habarlaıdy QazAqparat tilshisi.
Komıtet ókili balalardyń qaýipsizdik erejelerine sergek qaraýy ata-anasyna baılanysty ekenin aıtty.
«Elordada qydyrý úshin shyqqan januıa aıaq astynan balasynan aıyrylyp qaldy. Ata-ana degen balasyn qaıda apara jatqanyn oılaýy kerek qoı. Balamyzdy «kimge senip tapsyryp jatyrmyz», «onda qaýipsizdik erejeleri saqtala ma» degen suraqtarǵa jaýap izdeýimiz kerek. Árıne, bul úlken tragedııa. Ár balanyń qazasy - orny tolmaıtyn ókinish. Qaraly málimetterdi qarap jaǵamdy ustaımyn. 2016, 2017, 2018 jyly týǵan sábıler terezeden qulap, mert bolyp jatyr. Aptasyna 4-5 ret sondaı oqıǵa tirkeledi. Dál sol balalarǵa ata-analar qaramaǵanda kim qaraýy kerek? Terezeni tormen qalqalaý asa qymba ta emes. Qaýipsizdikti saqtaýdyń túrli joldary kóp. Erteń sol bir salǵyrttyq úlken ókinishke ákeledi», - deıdi Vladımır Bekker.
Ol mundaı jaǵdaılardan eshkimniń sabaq almaı jatqanyna ókinishin bildirdi.
«Bir ǵana jaýapsyzdyq qandaı ókinishke ákeletinin túsinetin kez jetti. Keıin sol úshin ómir boıy ózińizdi keshirmeı ketýińiz múmkin. Men barlyq ata-analarǵa aıtqym keledi. Turǵymbaev ta, Bekkerde de eshkimniń terezesine tor quryp bermeıdi. Óz balalaryńyzdyń qamyn ózderińiz de oılańyzdar. Mektepte balany qansha oqytsaq ta, qoǵamdyq sharalarda qansha túsindirsek te, erteń ákesi balanyń kózinshe baǵdarshamnyń qyzyl túsine ótip ketse, oıy buzylady. Osyndaı nemquraıly áreketter úlken ókinishterge ákep alyp kelýi ábden múmkin», - dedi ol.
