Vladımır Bekker erlik kórsetken elordalyqtardy marapattady
NUR-SULTAN. QazAqparat - QR ІІM Tótenshe jaǵdaılar komıteti erligimen kózge túsken elordalyqtardy marapattady, dep habarlaıdy QazAqparat TJ komıtetiniń baspasóz qyzmetine silteme jasap.
«Qazaqstan polıtsııasy kúni men Memlekettik qyzmetshi kúnine oraı, adam ómirin qutqarǵan azamattar batyldyǵy, qaısarlyǵy jáne azamattyq boryshyn adal oryndaǵany úshin marapattaldy.Saltanatty sharada QR ІІM Tótenshe jaǵdaılar komıtetiniń tóraǵasy Vladımır Bekker Ismaǵulov Nursultanǵa jáne Álibek Baqdáýletke «Tótenshe jaǵdaıdaǵy erligi úshin» tósbelgilerin tabystady», - dep habarlady QR ІІM TJK baspasóz qyzmetinen.
Vladımır Bekker batyrlarǵa alǵys aıtyp, olardyń jyldam áreket etýi arqyly birneshe adamnyń aman qalǵanyn atap ótti.
Eske sala ketsek, 2019 jyldyń 8 maýsymynda L.Gýmılev atyndaǵy EUÝ 2 kýrs stýdenti, 21 jastaǵy Nursultan Ismaǵulov Nur-Sultan qalasyndaǵy kópqabatty úılerdiń birinde bolǵan órtte batyldyq tanytyp, úsh balany qutqarǵan bolatyn.
Sonymen birge, aǵymdaǵy jyldyń 26 naýryzynda elordanyń Uly Dala kóshesi boıynda úsh avtobýs pen birneshe jeńil avtokólikterdiń qatysýymen jol-kólik oqıǵasy boldy. Sol sátte №303 baǵdardyń júrgizýshisi Baqdáýlet Álibek keri baǵytta ótip bara jatqan. Júrgizýshi kóligin toqtatyp, apat qurbandaryn qutqarýǵa asyqqan. Onyń qolǵabys etýimen qutqarý bólimsheleri kelgenshe avtobýstan 30-dan astam adam qutqaryldy, onyń ishinde balalar da bar.
