Vızasyz rejım engizilgennen keıin ShQO-ǵa Qytaıdan keletin týrıster sany artqan
ASTANA. KAZINFORM – Úkimet basshysy Oljas Bektenov Shyǵys Qazaqstan oblysynyń týrıstik áleýetimen tanysyp, salany odan ári damytý ári onyń óńir ekonomıkasynyń qurylymyndaǵy úlesin arttyrý jóninde birqatar tapsyrma berdi.
Biregeı tabıǵı-klımattyq jaǵdaılardyń arqasynda óńir týrızmniń barlyq túrin damytýdyń zor múmkindikterine ıe. Búgingi tańda demalýshylar arasynda Buqtyrma sý qoımasy men Sibe kólderiniń jaǵajaılary, Qaton-Qaraǵaı aýdanyndaǵy pantymen emdeý orny, aımaqtyń tarıhı nysandary, sondaı-aq Glýbokoe aýdany men Rıdderdegi taý shańǵysy týrızmi turaqty suranysqa ıe. Ótken jyly ShQO-daǵy ishki týrıstik aǵyn 2,7%-ǵa ósip, demalýshylar sany 350 myńnan asty. Sheteldik týrıster sanynyń artýyna Qazaqstan men QHR arasynda ornatylǵan vızasyz rejım yqpal etti.
Premer-Mınıstr Oljas Bektenov Glýbokoe aýdanynyń týrıstik ınfraqurylymymen jáne ekotýrızmdi damytý josparymen tanysty. Ekologııalyq standarttardy saqtaı otyryp iske asyrý kózdelip otyrǵan jobalar usynyldy. Úkimet basshysyna óńirde sanatorıı-kýrorttyq, qysqy, aýyl týrızmi túrleriniń damýy týraly baıandaldy. Jalpy, týrızm salasyn damytýǵa jáne jańa nysandardyń qurylysyna ótken jyly 12 mlrd teńge ınvestıtsııa salyndy.
«Shyǵys Qazaqstan oblysynyń ekologııalyq týrızmdi damytýǵa aıtarlyqtaı áleýeti bar. Prezıdent atap ótkendeı, týrıstik salaǵa ınvestorlar tartý úshin ashyq ári qolaıly jaǵdaı jasaý qajet. Búgingi tańda oblysta jeke ınvestıtsııalar tarta otyryp, jobalardy iske asyrý máselesi pysyqtalýda. Osy baǵytta óńir men ortalyqtyń kúsh-jigerin biriktirýdi tapsyramyn», - dedi Oljas Bektenov.
Premer-Mınıstr taý shańǵysy týrızmin damytý jáne tanymal etý qajettiligine basa nazar aýdardy. Qysqy jáne taý shańǵysy sport túrleri boıynsha el quramasyndaǵy sportshylardyń kóbi Shyǵys Qazaqstan oblysynyń týmasy ekeni atap ótildi. «Rıdder – Glýbokoe» taý shańǵysy klasterin odan ári damytý úshin Týrızm jáne sport mınıstrligine qysqy sport túrlerin damytýǵa járdem kórsetý tapsyryldy.
Oljas Bektenov týrıstik áleýetti ashý úshin kólik jelisi men áýe qatynasyn damytý boıynsha qabyldanyp jatqan sharalarmen tanysty. Kýrorttyq aımaqtyń kólik-logıstıkalyq qoljetimdiligin qamtamasyz etý maqsatynda Astana, Almaty, Shymkent jáne Qaraǵandydan Óskemenge tikeleı áýe qatynasy jolǵa qoıylǵan. Atyraýdan tikeleı baǵyt ashý kelisilip jatyr.
Bul rette Úkimet basshysy jol tóseminiń sapasyna jáne jol boıyndaǵy servıstiń zamanaýı jelisin qurýǵa jekeleı toqtaldy.
«Qanas – Marqakól» kólderiniń transshekaralyq baǵytyn uıymdastyrý úshin Terekti aýylynan Marqakól kóline deıingi jol jabynyn salý máselesin pysyqtaý, sondaı-aq ShQO aýmaǵy arqyly ótetin respýblıkalyq mańyzy bar avtomobıl joldarynyń boıynda keminde 15 sanıtarlyq-gıgıenalyq torap salýdy qamtamasyz etý tapsyryldy.
