Vızasyz qaıda barýǵa bolady: Qazaqstandyqtar arasyndaǵy tanymal baǵyttar
ASTANA. KAZINFORM – Jaz mezgilinde qazaqstandyqtar jaqyn jáne alys shet elderge qonaqqa nemese saıahattaýǵa jıi attanady. El turǵyndary qaı memleketterge vızasyz bara alady, al qaı elderge saparlaý úshin vızanyń maquldanýyn kútý qajet? Kazinform materıalynan oqyńyz.
Sapar maqsatyna qaraı qazaqstandyqtar shet memleketterge dıplomatııalyq pasportpen, qyzmettik pasportpen nemese Qazaqstan Respýblıkasy azamatynyń pasportymen bara alady. QR Syrtqy ister mınıstrliginiń resmı saıtynda el azamattaryna pasport túrine jáne josparlanǵan sapar merzimine qaraı vıza talap etilmeıtin elderdiń tizimi jarııalanǵan.
Ádettegi pasporty bar qazaqstandyqtar Albanııa, Andorra, Antıgýa jáne Barbýda, Grýzııa, Kolýmbııa, Moldova, Mońǵolııa, San-Marıno, Sent-Kıts jáne Nevıs, Sent-Vınsent jáne Grenadınder, Týnıs jáne Ýkraınada vızasyz 90 kúnge deıin bola alady.
Armenııa men Túrkııaǵa da vızasyz barýǵa bolady jáne bul elderde 180 kúndik kezeń ishinde 90 kúnge deıin bolýǵa ruqsat etiledi. ıAǵnı, jarty jylda atalǵan elderden birneshe ret shyǵyp, qaıta kire alasyz, al bolǵan kúnderińiz jıyntyq túrde esepteledi. Eger olardyń sany 90 kúnge jetse, vızasyz kirý múmkindigi toqtatylady.
Ázerbaıjan, Belarýs, Qyrǵyzstan, Tájikstan jáne Ózbekstanda da vızasyz 180 kún ishinde 90 kúnge deıin júrýge bolady. Biraq 30 kúnnen keıin jergilikti kóshi-qon organdarynda tirkeýden ótý talap etiledi.
Reseıge de vızasyz barýǵa bolady. Qazaqstan azamattaryna bul elde bir jyl ishinde 90 kúnge deıin bolýǵa ruqsat etilgen. Alaıda 2026 jylǵy 1 shildeden bastap Reseıge oqý nemese eńbek qyzmeti maqsatynda baratyn shetel azamattary úshin elektrondyq ruqsat júıesi (RUID) engiziledi.
Qazaqstan azamattary Domınıkan Respýblıkasynda vızasyz 60 kúnge deıin bola alady.
Al Argentına, Brazılııa, Vetnam, Qatar, Qytaı, Malaızııa, Maldıv Respýblıkasy, Marokko, Nıkaragýa, Birikken Arab Ámirlikteri, Oman, Seıshel araldary, Serbııa, Taıland, Fılıppın jáne Ekvadorǵa vızasyz baryp, 30 kúnge deıin bolýǵa múmkindik bar.
Ońtústik Koreıada da vızasyz 30 kúnge deıin qydyrýǵa bolady. Alaıda ol úshin 2022 jylǵy 1 sáýirden bastap engizilgen K-ETA elektrondyq kirý ruqsatyn aldyn ala rásimdeý qajet.
Al Chernogorııaǵa vızasyz kirý múmkindigi tek 2026 jylǵy 1 mamyr men 1 qazan aralyǵynda ǵana qoldanylady. Osy kezeńde qazaqstandyqtar atalǵan elde 30 kúnge deıin vızasyz júre alady.
Gonkongta (QHR), Iranda jáne Makaoda (QHR) vızasyz 14 kúnge deıin ruqsat bar. Al Barbadosta vızasyz júrý merzimi – 28 kún.
Zambııa, Indonezııa (kelgen sátte 30 kúnge deıin) jáne Mavrıkııde vızany áýejaıda rásimdeýge bolady.
Elge kirý úshin vıza talap etilse, ony saparǵa shyǵardan 1-2 aı buryn Qazaqstandaǵy tıisti memlekettiń elshiligine nemese konsýldyǵyna jeke júginý arqyly, ne senimdi týroperatorlar arqyly aldyn ala rásimdegen jón.
Keıbir elderdiń elshilikterinde vıza rásimdeý ýaqyty uzaqqa sozylýy múmkin, ásirese shetelge shyǵatyn týrıster sany artqan kezeńderde kóp kútýge týra keledi. Sonymen birge, ár memlekettiń elshiligi vıza berý tártibin óz betinshe belgileıdi: konsýlmen suhbat ótkizýi, alym mólsheri jáne qajetti qujattar tizimi de ártúrli bolady.
Vıza alǵansha sapar úshin aldyn ala tólem jasamaǵan durys. Sondaı-aq naqty kúnderge satyp alynǵan áýe bıleti vıza tezirek beriledi degendi bildirmeıdi.
Eger sapar kezinde basqa elder arqyly tranzıtpen ótseńiz, ol memleketterge tranzıttik vıza qajet pe jáne merzimi qandaı ekeni aldyn ala naqtylaý qajet.
Buǵan deıin osy jazda qazaqstandyq otbasy úshin sheteldegi demalystyń qansha turatynyn taldap kórgen edik.
