Vızalyq talaptardy jeńildetý jónindegi kelissózder aıaqtaldy — SІM
ASTANA. KAZINFORM — Qazaqstan azamattary úshin Shengen aımaǵyna vızalyq talaptardy jeńildetý jáne readmıssııa týraly kelisimder boıynsha sarapshylar deńgeıindegi kelissózder aıaqtaldy. Bul týraly Syrtqy ister mınıstrliginiń resmı ókili Erlan Jetibaev málim etti.
Atalǵan kelisimder aıasynda Qazaqstan azamattary úshin vızalyq talaptardy jeńildetý múmkindikteri qarastyrylyp jatyr. Atap aıtqanda, qujattar tizimin qysqartý, konsýldyq alym mólsherin tómendetý, kóp mártelik vızalar berý jáne vıza ótinishterin qaraý merzimderin qysqartý máseleleri talqylanǵan.
Sonymen qatar vedomstvo ókili tıisti kelisimderge qol qoıylǵannan keıin bul jóninde tolyq aqparat jarııalanatyn atap ótti.
— Taraptar qazirgi ýaqytta qujattarǵa qol qoıýǵa daıyndyq aıasynda ishki memlekettik rásimder kezeńine ótti. Qazaqstan óz tarapynan qajetti rásimderdi júrgizse, eýropalyq tarap Shengen aımaǵyna múshe memleketterdiń qatysýymen tıisti kelisý jumystaryn júzege asyrady. Osyǵan baılanysty kelisimderge qol qoıý belgili bir ýaqytty talap etedi. Jańa aqparat paıda bolǵan jaǵdaıda bul jóninde qosymsha málimdeme jasalady, — dep tolyqtyrdy ol.
Buǵan deıin Qazaqstan men EO vıza men readmıssııa boıynsha kelissózderdiń jańa kezeńine ótkenin jazǵanbyz.
