Vıza saıasaty týrızmge tusaý salmaýy kerek - Aıa Qusaıynova
NUR-SULTAN. QazAqparat - Ulttyq týrızm ındýstrııasy qaýymdastyǵynyń basshysy Aıa Qusaıynova ishki týrızmdi damytý máselelerin talqylaǵan jıynda vıza saıasatyn jeńildetpeı, týrızmdi damytý múmkin emestigin aıtty, dep habarlaıdy QazAqparat tilshisi.
«Vıza berý tártibin ońtaılandyrýdyń mańyzy zor. Bıylǵy ózgeristerdiń ózi týrıster sanyn eleýli mólsherde arttyrǵanyn kórip júrmiz. Alysqa barmaı-aq, Nur-Sultan qalasynyń ózinen kópshilik oryndarda shetel azamattarynyń kóbeıgenin baıqaýǵa bolady. Sondyqtan vıza saıasaty týrızmniń aıaǵyna tusaý bolmaýy kerek» - dedi Aıa Qusaıynova.
Qaýymdastyq ókiliniń aıtýynsha, «Kazakh Tourism» kompanııasynyń otandyq týroperatorlarǵa bet burýy ishki týrızmniń damýyna sep bolmaq.
«Buǵan deıin memleket tarapynan sheteldik kompanııalardyń nazaryn aýdarýǵa kóp kúsh jumsaldy. Otandyq operatorlar kóleńkede qalǵandaı bolǵan. «Kazakh Tourism» bizdiń únimizge qulaq asyp, tuńǵysh ret otandyq operatorlar úshin týr uıymdastyryp otyr. Osynyń arqasynda jergilikti týrıstik kompanııalar shetelden meıman shaqyrýǵa áýrelenbeı, ishki týrısterge baǵyttalyp jumys isteı bastaıdy», - dedi Aıa Qusaıynova.
Sondaı-aq, ol Qazaqstanǵa týrıster tartýda júıelilik jetispeıtinin aıtty.
«Jarnama alǵashynda naqty birneshe memleketke ǵana baǵyttalýy kerek. Al ınfraqurylym men servıs sapasy týrıster sany kóbeımeıinshe qalypqa túspeıdi. Jergilikti bıznes nysandary men qyzmet kórsetýshi kompanııalar, aýyldaǵy kásipkerler týrısten paıda túsetinin kórgende ǵana qyzmet sapasyn arttyrýdy oılaı bastaıdy» - dedi Ulttyq týrızm ındýstrııasy qaýymdastyǵynyń basshysy.
