Vıza alǵyń kelse, orys tilin bil
ASTANA. QazAqparat - Reseıdiń Federatsııa keńesinde sheteldikterdi orys tilin, tarıhy men Reseı zańnamalarynyń negizin biletinin naqtylaýdy mindetteıin zań jobasy maquldandy. Bul sheteldikterge jumys vızasyn nemese ýaqytsha turýǵa ruqsat alý úshin qajet bolatyn kórinedi, dep jazady «Egemen Qazaqstan» gazeti.
Osylaısha, «Reseı Federatsııasyndaǵy shetel azamattarynyń quqyqtyq jaǵdaılary týraly» zańǵa ózgerister engizildi. Al shetel azamattarynyń bilim týraly sertıfıkaty joǵaryda atalǵandardy olardyń biletinin qýattaıtyn qujat bolyp tabylmaq. Ony berýmen Reseı aýmaǵyndaǵy nemese odan tysqary jerlerdegi orys tilinen, tarıhynan jáne zańnamalar negizinen emtıhan ótkizetin bilim berý uıymdary aınalysatyn bolady. Sertıfıkattyń kúshinde bolý merzimi 5 jyl dep belgilenipti. Bul merzim aıaqtalǵan soń qujatty qaıtadan alý qajettigi týyndaıdy.
