Vıttorıo Brýmottı: Velosıpedke otyrsam aqylǵa erik bermeı ketemin
ASTANA. QazAqparat - Álemge tanymal velosıpedpen trıýk jasaýshy Vıttorıo Brýmottı óziniń qyzyqty ári qaýipti ónerimen barshany tamsandyrýdy qoıatyn emes. Búgin ıtalııalyq sportshy 12 tamyzda Elordada ótetin «Týr EKSPO-2017» velosaıysyna qatysý úshin Astanaǵa keldi. «QazAqparat» HAA tilshisine bergen eksklıýzıvti suhbatynda Brýmottı velosıpedpen kózsiz erlikke bararda neden shabyttanatynyn, sporttyń osynaý qaýipti túrin qalaı tańdaǵanyn aıtyp berdi.
- Vıttorıo, Siz Astananyń «Han shatyry», alyp kópiri men ózge de záýlim saraılaryn baǵyndyrý úshin kelgen ekensiz. Sizdiń kelesi kezekte kózdep otyrǵan maqsatyńyzdy bilýge bola ma?
- Men ázirge ol týraly oılanbappyn. Men eshqashan kelesi joly qandaı qadamǵa baratynymdy bile bermeımin.
- Ádette, qaýipti nómirlerdi oryndaý aldynda týraly oılaısyz?
- Men ol sátterde árqashan ózimniń áke-sheshemdi oılaımyn. Bul maǵan qýat berip, jańa qaýipterden aman-esen ótýge kómektesedi.
- Kúrdeli trıýktardy jasaý úshin barynsha daıyndalǵanyńyz kórinip tur. Jattyǵýǵa qansha ýaqyt bólesiz?
- Men kúnde sporttan qol úzbeımin. Máselen, búgin de uzaq ýaqyt ushyp kelgenimen qaramastan, bı ónerimdi shyńdaýǵa ýaqyt taptym. Ony úırený arqyly ózimniń shynyqqan qalpymdy saqtaı alamyn. Men sporttyń osy túrimen 25 jasymnan beri aınalysa bastadym. Sonymen birge, velotrıalǵa erekshe qyzyqtym. Tolaǵaı eńbek jemisin berdi - álem chempıony atandym. Bes jyl buryn tas joldaǵy velosıpedke qyzyǵa bastadym. Ózimniń trıýktarymdy vıdeoǵa túsirdim. Sodan beri tas joldaǵy velosıpedten alystaǵan joqpyn. Salmaǵym 82 keli bolǵandyqtan, jattyǵýdan qol úzbeý men úshin óte mańyzdy. Men aınalysyp júrgen sport túrinen óte myqty ári epti bolmasa bolmaıdy.
- Sizdiń trıýktaryńyzdy vıdeodan qarap otyryp, úreıden aryla almaı otyramyz. Ózińiz trıýktardy oryndaý kezinde qoryqpaısyz ba? Úreıińizdi qalaı jeńesiz?
- Adrenalın - bul meniń ómirim. Sondyqtan, trıýktardy jasaıtyn kezde men múlde qoryqpaımyn. Úreı deseńiz, men trıýk kezinde polıtsııadan ǵana jasqanamyn. Sebebi, óz maqsattarymdy oryndaý úshin eshqandaı jergilikti organnyń ruqsatynsyz eń biregeı oryndardy tańdap alamyn. Velosıpedke otyrsam, shyny kerek, azdap aqylyma erik bermeı ketemin de, oıyma kelgen isti jasaı beremin. Velosıpedke otyrmasam, kóptiń birimin. Eshqandaı qorqynyshqa jol bergen emespin. Men - «velosıpedtiń ústindegi bıshimin».
- Trıýktardyń kóbin nelikten kórermensiz júzege asyrasyz?
- Túsinesiz be, meniń isim - búkil ómirimniń qýanyshy. Men trıýktardy eshkim úshin emes, ózim úshin jasaımyn. Shamamen eki aı buryn ózim túsiretin vıdeonyń qalybyn ózgertip tastadym: kópirlerdi túsirip, Eýropadaǵy eń úlkenin izdedim. Ol - Frantsııada eken. Chernogorııa men ózge de memleketterdiń kópirlerin túsirý ádetime aınaldy. Men bul úshin eshkimnen aqsha almaıtynymdy, ózim úshin jasaıtynymdy taǵy da aıta ketkim keledi. Adamdarǵa meniń ónerim unaıtyn bolýy kerek. Olardyń kelgeni de jaqsy, biraq bul is eń aldymen ózime kerek.
- Jaraqat alǵan kezderińiz boldy ma?
- Buryn táýekeli az bolǵan kezde jaraqat alyp qalatyn edim. Qazir ondaı nusqa joq: nemese bári oıdaǵydaı bolady nemese qaıǵyly jaǵdaı týyndaýy yqtımal.
- Velosıpedtiń óz ómirińizdi zor mańyzǵa ıe ekenin aıtyp óttińiz. Al avtokólikke otyrasyz ba?
- Avtokólikke de qatty qyzyǵamyn. Velosıpedten kem kórmeımin. Sońǵy 5 jylda 65 avtokólik aýystyryp úlgerdim. Ártúrli kólikti tebe beremin. Lamborghini, Aston Martin sekildi avtokóliktermen júrý baqyty buıyrypty. Sonymen birge, naǵyz jerlesterimdeı Italııada shyǵarylǵan avtokólikterge qyzyǵýshylyǵym zor.
- Suhbat bergenińiz úshin rahmet!
