Vıtse-prezıdentke qandaı qyzmet júkteledi

ASTANA. KAZINFORM – Konstıtýtsııalyq reformalar jónindegi komıssııanyń ekinshi otyrysynda Ádilet mınıstri Erlan Sársembaev vıtse-prezıdentke qandaı qyzmet júkteletinin aıtty.

Onyń aıtýynsha, vıtse-prezıdent ókildi organnyń depýtaty bolýǵa, basqa da aqyly laýazymdardy atqarýǵa, kásipkerlik qyzmetpen aınalysýǵa jáne saıası partııalardyń múshesi bolýǵa quqyly emes. Vıtse-prezıdent úshin belgilengen shekteýler, onyń ishinde partııaǵa múshe bolmaýy, depýtattyq mandatqa jáne basqa aqyly qyzmetterge tyıym salý eldiń Aat zańymen bekitilgen talaptarǵa uqsas.

— Mundaı talaptar atalǵan laýazymnyń saıasılandyrylmaǵan jáne kásibı sıpatta bolýyna yqpal etedi, — dedi mınıstr.

Erlan Sársembaevtyń aıtýynsha, vıtse-prezıdent Memleket basshysynyń tapsyrmasymen eldiń syrtqy ókildigin qamtamasyz etýge, negizgi memlekettik ınstıtýttarmen ózara is-qımyl jasaýǵa, sondaı-aq azamattyq qoǵammen, ǵylymı, mádenı jáne saraptamalyq qaýymdastyqtarmen dıalogty damytýǵa mindetti. Bul ókilettikter negizgi sıpatta bolyp, qajet bolǵan jaǵdaıda Prezıdent tarapynan naqtylanýy múmkin.

Eger vıtse-prezıdent Prezıdenttik ókilettikterdi ózine qabyldaı almasa, onda ol Quryltaı tóraǵasyna, al sońǵysy da múmkin bolmasa, Premer-Mınıstrge ótedi.

— Prezıdenttik ókilettikterdi qabyldaǵan tulǵa sáıkesinshe vıtse-prezıdent, Quryltaı tóraǵasy, Premer-mınıstr laýazymdarynan bosatylady. Bul jaǵdaıda bos memlekettik laýazymdar Konstıtýtsııada kózdelgen tártippen almastyrylady. Qoǵam úshin bul syrtqy nemese ishki jaǵdaılarǵa qaramastan turaqtylyqty jáne memlekettiń zańdy jáne júıeli túrde áreket etetindigine tolyq senimdilikti bildiredi, — dep atap ótti ol.

Buǵan deıin ol Prezıdentke qandaı laýazym ıelerin taǵaıyndaý quqyǵy beriletinin aıtqan edi.