Vıtse-prezıdentke qoıylatyn talaptardyń úlgisi jarııalandy – Konstıtýtsııalyq reforma
ASTANA. KAZINFORM – Prezıdenttiń quqyqtyq máseleler jónindegi kómekshisi Erjan Jıenbaev elimizde engiziletin jańa ınstıtýt – Vıtse-prezıdenttiń ókilettigine qatysty konstıtýtsııalyq ózgerister týraly aıtyp berdi.
Konstıtýtsııalyq reforma jónindegi komıssııanyń birinshi otyrysynda Prezıdent kómekshisi jańa Ata zańǵa mynadaı negizgi qaǵıdalardy engizýdi usyndy:
– Vıtse-Prezıdentti Quryltaıdyń kelisimimen (jalpy depýtattar sanynyń kópshilik daýysymen) Prezıdent taǵaıyndaıdy. Bul tásil QR Premer-Mınıstrin taǵaıyndaý rásimine sáıkes keledi.
– Vıtse-Prezıdentti qyzmetinen Prezıdent bosatatyn bolady.
Sonymen birge, Konstıtýtsııada Vıtse-Prezıdenttiń ókilettikterine qatysty mynadaı negizgi qaǵıdalardy kórsetý usynyldy:
Vıtse-Prezıdent:
– Prezıdenttiń tapsyrmasy boıynsha Qazaqstan Respýblıkasynyń halyqaralyq qatynastardaǵy múddelerin bildiredi;
– Quryltaımen, Úkimetpen jáne ózge de memlekettik organdarmen ózara is-qımyl barysynda Prezıdenttiń atynan ókildik etedi.
– Sonymen birge, Vıtse-Prezıdent Qazaqstan Respýblıkasy Prezıdenti atynan Qazaqstan Respýblıkasynyń jáne shetelderdiń qoǵamdyq-saıası, ǵylymı jáne mádenı-aǵartýshylyq uıymdarymen qarym-qatynas ornatady.
– Vıtse-Prezıdent ókildi organnyń depýtaty bolmaýǵa, ózge de aqyly laýazymdardy atqarmaýǵa jáne kásipkerlik qyzmetti júzege asyrmaýǵa tıis.
– Óz ókilettikterin júzege asyrý kezeńinde Vıtse-Prezıdent saıası partııanyń múshesi bolmaýǵa tıis. Mundaı tártip saıası básekelestikti arttyrýǵa jáne barlyq partııalardyń damýy úshin teń jaǵdaıdy qamtamasyz etýge baǵyttalǵan ustanymǵa sáıkes keledi.
Vıtse-Prezıdenttiń ózge de ókiletteri Prezıdent aıqyndaıdy jáne Vıtse-Prezıdent ınstıtýtynyń engizilýine baılanysty Konstıtýtsııadan Memlekettik keńesshi týraly normalar alynyp tastalady.
Aıta keteıik, Jibek Joly arnasy Konstıtýtsııalyq reforma jónindegi komıssııanyń birinshi otyrysyn tikeleı efırde kórsetedi.
Memleket basshysy Qasym-Jomart Toqaev Ulttyq quryltaıdyń V otyrysynda neke ınstıtýtyn «er men áıeldiń erikti, resmı odaǵy» dep zańmen bekitýdi usynǵan edi.