Vıtse-prezıdent Rodrıges: Venesýela eshbir eldiń otary bolmaıdy

ASTANA. KAZINFORM — Venesýela vıtse-prezıdenti Delsı Rodrıges AQSh-tan Nıkolas Madýrony dereý bosatýdy talap etip, «Venesýela eshbir eldiń otary bolmaıdy» dep málimdedi. Bul týraly Anadolý agenttigi jazdy.

AQSh-tyń aralasýynan jáne prezıdent Nıkolas Madýro men onyń jubaıynyń urlanýynan keıin Venesýelanyń Qorǵanys keńesi tótenshe otyrysqa jınaldy.

Otyrys barysynda sóz sóılegen Venesýela vıtse-prezıdenti Delsı Rodrıges AQSh-ty «prezıdent Madýrony dereý bosatýǵa» shaqyrdy.

Rodrıges el ishindegi tynyshtyqty qamtamasyz etýge jáne ultty qorǵaýǵa úndedi.

«Venesýela eshbir memlekettiń otary bolmaıdy», dedi Rodrıges.

Sondaı-aq ol Madýronyń «ulttyń jalǵyz zańdy prezıdenti» ekenin atap ótti.

«Venesýelaǵa jasalyp otyrǵan áreket — halyqaralyq quqyqty óreskel buzatyn jabaıylyq» degen ol AQSh ákimshiligi tarıh pen ádilet aldynda jaýap beretinin eskertti. 

Rodrıgestiń aıtýynsha, Venesýelanyń búkil halqy taýarlar men qyzmetterdiń qaýipsizdigin qamtamasyz etý úshin «birikti». Qazirgi ýaqytta elde tynysh jaǵdaı saqtalyp otyr jáne bılik ony ári qaraı da ustap turýǵa barynsha nıetti.

Aıta keteıik, Venesýeladaǵy oqıǵaǵa baılanysty álem elderiniń reaktsııasy qandaı ekenin jazdyq.