Vıtse-prezıdent laýazymy áýejaılarda qarap-tekserýden ótkizilmeıtin tulǵalar tizimine engizildi
ASTANA. KAZINFORM – Úkimet Qazaqstan áýejaılarynda erekshe tártippen qyzmet kórsetiletin laýazymdy tulǵalardyń tizimine ózgerister engizdi. Tıisti qaýlyǵa 2026 jylǵy 14 shildede qol qoıyldy.
Qujatqa sáıkes, áýe kóligimen tasymaldanatyn jáne áýejaılarda qarap-tekserýden ótkizilmeıtin laýazymdy tulǵalardyń tizimi jańartyldy.
Jańartylǵan tizimge alǵash ret Qazaqstan Respýblıkasy vıtse-prezıdentiniń laýazymy engizildi.
Sonymen qatar Qazaqstan Respýblıkasy Quryltaıy tóraǵasy men «Qazaqstan Halyq Keńesi» tóraǵasy laýazymdarynyń ataýy jańa redaktsııada berildi. Al Qazaqstan Respýblıkasy Parlamenti Májilisi tóraǵasynyń laýazymy tizimnen alynyp tastaldy.
Osyǵan uqsas ózgerister áýejaılardyń arnaıy zaldarynda qyzmet kórsetiletin tulǵalar tizimine de engizildi. Atap aıtqanda, bul tizimge vıtse-prezıdent laýazymy engizilip, Quryltaı tóraǵasy men «Qazaqstan Halyq Keńesi» tóraǵasy laýazymdarynyń ataýy jańartyldy. Al Májilis tóraǵasynyń laýazymy tizimnen shyǵaryldy.
Sonymen qatar áýejaılardyń arnaıy zaldarynda qyzmet kórsetý quqyǵy bar tulǵalardyń sanaty naqtylandy. Jańartylǵan tizimge:
· Astana, oblystar jáne respýblıkalyq mańyzy bar qalalardyń ákimderi;
· Quryltaı komıtetteriniń tóraǵalary;
· Quryltaı depýtattary;
· Quryltaı apparaty men Konstıtýtsııalyq sot apparatynyń basshylary;
· Prezıdent, vıtse-prezıdent, Premer-mınıstr, Quryltaı tóraǵasy, Premer-mınıstrdiń orynbasarlary, Quryltaı tóraǵasynyń orynbasarlary, Syrtqy ister mınıstri jáne Úkimettiń ózge de músheleri bastaıtyn Qazaqstannyń resmı delegatsııalarynyń músheleri engizildi.
Qaýly 2026 jylǵy 17 shildeden bastap qoldanysqa engizildi.
Eske salaıyq, buǵan deıin áýejaılar, vokzaldar men porttarǵa ataý berý qaǵıdalaryna ózgerister engizilip, endi mundaı nysandarǵa adamnyń esimi ol qaıtys bolǵannan keıin keminde bes jyl ótken soń ǵana beriletini habarlanǵan bolatyn.
