Vıtse-prezıdent ınstıtýty saıası júıeni teńgerý úshin qajet – Ǵazız Ábishev
ASTANA. KAZINFORM – Saıasattanýshy Ǵazız Ábishev Jibek Joly telearnasyna bergen suhbatynda Ulttyq quryltaıdyń V otyrysynda aıtylǵan saıası reformalarǵa qatysty pikir bildirdi.
Onyń aıtýynsha, Memleket basshysy Qasym-Jomart Toqaev Ulttyq quryltaıda usynǵan negizgi jańashyldyqtardyń biri – Qazaqstanda vıtse-prezıdent laýazymyn engizý.
Ǵazız Ábishev Prezıdenttiń syrtqy saıasattaǵy saparlary óte tyǵyz kestemen ótetinin atap ótti. Onyń sózinshe, kópshilikke kórinetin resmı is-sharalar – Memleket basshysy jumysynyń tek syrtqy bóligi ǵana. Al onyń artynda aýqymdy analıtıkalyq sharýalar, qujattardy ázirleý jáne sheshim qabyldaý úderisi jatyr.
Sarapshy Qazaqstannyń ishki jáne syrtqy saıasattaǵy belsendiligi joǵary ekenin aıtyp, vıtse-prezıdenttiń bolýy júktemeni tıimdi bólýge múmkindik beretinin jetkizdi.
— Vıtse-prezıdent ınstıtýtynyń qajettiligin ár qyrynan qarastyrýǵa bolady, jáne solardyń biri – saıası júıeni teńgerý. Eger Memleket basshysynyń tek ótken jylǵy syrtqy saparlarynyń kestesine qarap, ony ishki is-sharalarmen salystyrsaq, Prezıdentke túsetin júktemeniń qanshalyqty aýqymdy ekeni anyq kórinedi. Keı jaǵdaılarda ol bir jarym-eki apta ishinde birneshe qurlyqta bolyp, kún saıyn mańyzdy sharalarǵa qatysqan. Bul – jumystyń tek syrtqy kórinisi ǵana. Al buǵan qosa analıtıka, qujattar, sheshimder qabyldaý sekildi aýqymdy jumys bar. Osy turǵydan alǵanda, Memleket basshysynyń eń jaqyn komandasyndaǵy, Konstıtýtsııamen bekitilgen vıtse-prezıdent laýazymyn engizý oryndy ári qajetti qadam bolyp kórinedi. Qazaqstannyń ishki jáne syrtqy saıasattaǵy joǵary belsendiligin eskersek, mundaı ınstıtýt Prezıdentti saqtandyryp, prezıdenttik bıliktiń tıimdiligin arttyra alady, – dedi Ǵazız Ábishev.
Sondaı-aq saıasattanýshy Prezıdenttiń taǵy bir bastamasyna – Halyq keńesin qurýǵa qatysty pikir bildirdi. Atalǵan organ zań shyǵarý bastamasy quqyǵyna ıe bolady. Sonymen qatar oǵan Qazaqstan halqy Assambleıasy men Ulttyq quryltaıdyń bazalyq fýnktsııalary beriledi.
— Azamattyq qoǵamnyń keń aýqymyn qamtıtyn keńesshi, ıaǵnı delıberatıvti demokratııa organdary – kóptegen elderde keń taralǵan tájirıbe. Mundaı qurylymdar Frantsııada, Kanadada, Danııada jáne basqa da birqatar elderde bar. Bul organdarda saıası básekeden tys, memlekettik bılik pen partııalyq adaldyq sheńberinen erkin azamattyq qoǵam ókilderi jınalyp, qoǵamdyq máselelerdi talqylaıdy, – dedi sarapshy.