Vıtse-prezıdent ınstıtýty saıası sabaqtastyq pen teńgerimdi saqtaıdy – sarapshy

TAShKENT. KAZINFORM – Ózbekstan Ǵylym akademııasy Memleket jáne quqyq ınstıtýtynyń aǵa ǵylymı qyzmetkeri Ravshan Nazarov Qazaqstanda júrgizilip jatqan konstıtýtsııalyq reformalarǵa qatysty pikir bildirdi, dep habarlaıdy Kazinform agenttiginiń menshikti tilshisi.

Áýeli sarapshy Qyzylorda qalasynda ótken besinshi Ulttyq Quryltaıda Prezıdent Qasym-Jomart Toqaev kótergen bastamalardyń mańyzyna toqtaldy. Ravshan Nazarovtyń pikirinshe, Qazaqstan zaman talabyna saı saıası transformatsııaǵa bet aldy.

- Qazirgi ýaqytta Qazaqstanda tarıhı ózgerister bolyp jatyr. Bul tek eldegi ishki saıası jaǵdaıǵa emes, sonymen qatar syrtqy saıası baǵdarǵa da áser etedi. Ásirese, bul Qazaqstanmen tikeleı shekaralas memleketterge qatysty. Ózbekstan Qazaqstannyń jaqyn kórshisi jáne senimdi seriktesi retinde respýblıkada júrgizilip jatqan reformalardy muqııat baqylap otyrady. Qazaqstannyń Táýelsizdik jyldary jınaqtaǵan saıası tájirıbesi, Qasym-Jomart Toqaevtyń bastamalary qoǵamnyń damýyna tyń serpilis beritinine senimdimin, - dedi Ravshan Nazarov.

Sarapshynyń paıymynsha, bir palataly Parlament modeline kóshý óte mańyzdy sheshim. Atap aıtqanda, bul - zań jobalaryn sapaly saralap, olardy óz ýaqytynda qabyldaý mehanızmin júıeleıdi.

- Bul úrdis mańyzdy zańnamalyq aktilerdi qabyldaýdy jedeldetýge yqpal etedi. Búginde normatıvtik-quqyqtyq qujattardy tez arada qarap, maquldaý ózgerip jatqan geosaıası jaǵdaıdyń yrǵaǵyna ýaqytyly ilese bilý degendi bildiredi. Taǵy bir mańyzdy másele - vıtse-prezıdent laýazymyn engizý. Mundaı tájirıbe AQSh, Meksıka, Úndistan sııaqty iri elderde bar. Vıtse-prezıdent ınstıtýty ótpeli kezeńderde saıası sabaqtastyq pen teńgerimdi saqtaýǵa múmkindik beredi. Bizdiń oıymyzsha, bul óte mańyzdy saıası qadam. Degenmen bul kúrdeli reforma. Sondyqtan oǵan asa joǵary jaýapkershilikpen qarap, ony qoǵam talqysyna salý oryndy, - dep pikir bildirdi saıasattanýshy.

Sonymen qatar, Ravshan Nazarov Parlamentti Quryltaı dep ataýǵa qatysty óz oıyn bildirdi. Ol atap ótkendeı, Qazaqstan ejelgi jáne ortaǵasyrlyq ulttyq memlekettilik pen tarıhı sabaqtastyqtyń jarqyn úlgisin kórsetip otyr.

- «Quryltaı» sózi túrki halyqtarynyń arasynda tereń tarıhı mańyzǵa ıe. Sáıkesinshe, biz ejelgi jáne ortaǵasyrlyq ulttyq memlekettilik pen tarıhı sabaqtastyqtyń jarqyn úlgisin kórip otyrmyz. Osylaısha, Qazaqstan ǵasyrlarǵa jalǵasqan dala demokratııasy men saıası memlekettik ınstıtýttyń murageri sanalatynyn aıǵaqtap otyr. Bul óte batyl qadam ári mańyzdy sheshim, - dep qorytyndylady Ravshan Nazarov.

Eske salaıyq, buǵan deıin Qazaqstandaǵy konstıtýtsııalyq reformalar týraly eýropalyq sarapshylar pikir bildirgen bolatyn.