Vıtse-prezıdent ınstıtýty bılik ıerarhııasyn birjola aıqyndap beredi — Konstıtýtsııalyq komıssııa

ASTANA. KAZINFORM — Qazaqstannyń Halyq Keńesi Qazaqstan halqy Assambleıasy men Ulttyq quryltaıdyń strategııalyq fýnktsııalaryn oryndaýdy jalǵastyrady. Bul týraly Prezıdenttiń quqyqtyq máseleler jónindegi kómekshisi Erjan Jıenbaev Konstıtýtsııalyq reforma jónindegi komıssııanyń alǵashqy otyrysynda aıtty.

— Ulttyq quryltaıdyń besinshi otyrysynda Memleket basshysy «birneshe jyl boıy muqııat qalyptastyryp kele jatqan saıası qurylymnyń úılesimdi túıini» retinde tarıhı ári mańyzdy usynys aıtty. Prezıdent birqatar elde bar Vıtse-prezıdent ınstıtýtyn engizýdi usyndy. Memleket basshysynyń ózi atap ótkendeı, «bizdiń jaǵdaıymyzda bul laýazymdy engizý memleketti basqarý protsesin turaqtandyrady. Sondaı-aq bılik ıerarhııasyn birjola aıqyndap beredi, — dedi Erjan Jıenbaev.

Sonymen birge, reformalardyń jańa kezeńinde qoǵam damýynyń barlyq máselesine qatysty turaqty jalpyulttyq dıalog júrgizý úshin aýqymdy platforma retinde Qazaqstannyń Halyq Keńesin qurý usynyldy.

— Atalǵan organ halqymyzdyń yntymaq-birligin nyǵaıtýǵa yqpal etetin negizgi qoǵamdyq-saıası birlestikter men qurylymdardy qosyp, Qazaqstan halqy Assambleıasy men Ulttyq quryltaıdyń strategııalyq fýnktsııalaryn oryndaýdy jalǵastyrady. Osy eki mańyzdy ınstıtýt boıynsha negizgi erejeler Konstıtýtsııa deńgeıinde tıisti reglamentteýdi talap etedi, — dedi Prezıdenttiń quqyqtyq máseleler jónindegi kómekshisi.

Aıta keteıik, Jibek Joly arnasy Konstıtýtsııalyq reforma jónindegi komıssııanyń birinshi otyrysyn tikeleı efırde kórsetedi.

Memleket basshysy Qasym-Jomart Toqaev Ulttyq quryltaıdyń V otyrysynda neke ınstıtýtyn «er men áıeldiń erikti, resmı odaǵy» dep zańmen bekitýdi usynǵan edi.