Vıtse-premer Jaslan Mádıev Qaraǵandy oblysyna bardy
ASTANA.KAZINFORM - Qazaqstan Premer-mınıstriniń orynbasary – Jasandy ıntellekt jáne tsıfrlyq damý mınıstri Jaslan Mádıev Qaraǵandy oblysyna jumys saparymen bardy. Bul týraly Úkimettiń baspasóz qyzmeti habarlady.
Tsıfrlandyrý jáne jasandy ıntellekt jyly aıasynda 2026 jylǵa arnalǵan tsıfrlyq transformatsııanyń basym baǵyttaryn aıqyndaý boıynsha óńirlermen júıeli jumys jalǵasyp jatyr. Ákimdiktermen jáne jergilikti salalyq uıymdarmen birlesip, tsıfrlyq damý josparlary men jasandy ıntellekt sheshimderin engizýge daıyndyq deńgeıine salystyrmaly taldaý júrgizilip jatyr.
Qaraǵandy qalasynda oblys basshylyǵy jáne salalyq qyzmettermen kezdesý ótti. Kezdesý barysynda óńirdegi tsıfrlyq transformatsııanyń serpini, IT-ındýstrııanyń damýy, sondaı-aq jasandy ıntellektige negizdelgen sheshimderdi ekonomıka men memlekettik basqarý júıesine engizý máseleleri talqylandy.
Talqylaýdyń negizgi baǵyttary telekommýnıkatsııalyq ınfraqurylym men kıberqaýipsizdikti damytý, óńirlik IT-habtardyń áleýetin arttyrý, halyqqa qyzmet kórsetý tsıfrlyq keńselerin transformatsııalaý, Smart City jobalaryn júzege asyrý, sondaı-aq ekonomıkanyń naqty sektoryn tsıfrlandyrý boldy.
Árbir atalǵan baǵyt boıynsha óńirlik erekshelikter men nysanaly kórsetkishterdi eskere otyryp, olardy odan ári damytýǵa arnalǵan usynystar men tásilder tanystyryldy.
Óńirde qoǵamdyq qaýipsizdik, kólik, qalalyq ınfraqurylym jáne derekterdi basqarý salalarynda tsıfrlyq júıeler naqty ýaqyt jaǵdaıynda jumys isteıdi. Vıtse-premer qoldanystaǵy tsıfrlyq júıelerdiń qyzmetimen tanysty. Olardyń kúndelikti tájirıbedegi tıimdiligi baǵalanyp, álsiz tustary anyqtalyp, kúsheıtý sharalary belgilendi.
Kezdesý qorytyndysy boıynsha azamattar úshin yńǵaıly, bıznes úshin tıimdi bolǵany jáne úrdisterdiń ashyqtyǵy basymdyqqa alyna otyryp, 2026 jylǵa arnalǵan josparǵa engiziletin naqty mindetter men usynystar tizbegi jasaqtaldy.
Aıta keteıik, bıyl elimizde Tsıfrlandyrý jáne jasandy ıntellekt jyly dep jarııalandy. Prezıdent janyndaǵy Qazaqstan strategııalyq zertteýler ınstıtýty qazaqstandyqtardyń kúndelikti ómirine jańa tehnologııalardy engizýge qalaı qaraıtynyn anyqtaý maqsatynda saýalnama júrgizdi.