Vıtse-premer: Salyqty kóterýdiń ınflıatsııaǵa áseri bir jylda aıaqtalady

ASTANA. KAZINFORM – Premer-mınıstrdiń orynbasary - Ulttyq ekonomıka mınıstri Serik Jumanǵarın Úkimet otyrysynda salyqty kóterýdiń ınflıatsııaǵa áseri bir jylda aıaqtalady dep sendirdi.

— Salyq túsimderiniń ósýi jyl saıyn 4-5 trln teńgeni quraıdy dep kútemiz. Bul qarajat Ulttyq qorǵa táýeldilikti azaıtyp, memlekettik borysh deńgeıin tómendetýge, qosymsha resýrstardy ınfraqurylymdy, agroónerkásip keshenin, óńdeý ónerkásibin jáne qorǵanysty damytýǵa kómektesedi.

Salyqty kóterýdiń yqtımal ınflıatsııalyq áseri qysqa merzimdi bolatynyn jáne bir jyl ishinde aıaqtalatynyn atap ótý qajet. Qosymsha ınflıatsııa 3% kólemde kútiledi, - dedi Serik Jumanǵarın.

Mundaı ýájdi ol ózge elderdiń tájirıbesine súıenip aıtyp otyrǵanyn jetkizdi. 

— Basqa elderdiń tájirıbesi kórsetkendeı, QQS óskennen keıin ortalyq bankter kóbine paıyzdyq mólsherlemelerdi tómendetedi. Bul ekonomıkany turaqtandyrýǵa yqpal etedi, - dedi vıtse-premer.

Eske salsaq, keshe Úkimet QQS-ny saralap engizýdiń jańa sharttaryn jarııalaǵan bolatyn.