Vıtse-premer Májiliste salyq túsimderi men bıýdjet tapshylyǵyn túsindirdi
ASTANA. KAZINFORM – Serik Jumanǵarın respýblıkalyq bıýdjet kiristerin qalyptastyrý tetikterin túsindirdi.
Ekonomıkanyń ósýi bıýdjetke túsetin salyqtar soǵan proportsıonal ósip jatyr degendi bildirmeıdi. Oǵan syrtqy jáne ishki faktorlar áser etedi, máselen QQS-ty qaıtarý, munaı kiristerin bólý sııaqty birqatar sebepter bar. Bul týraly Parlament Májilisiniń otyrysynda 2025 jylǵy respýblıkalyq bıýdjettiń atqarylýy týraly esepti qaraý kezinde depýtattyń qazynaǵa 3 trln teńgeden astam qarajat kem túskeni týraly suraǵyna jaýap bergen Premer-mınıstrdiń orynbasary Serik Jumanǵarın habarlady.
Onyń aıtýynsha, kiristerdiń qorytyndy nátıjesine energııa resýrstarynyń álemdik baǵasy men ulttyq valıýta baǵamynyń dollarǵa qatysty aýytqýy aıtarlyqtaı áser etedi. Sonymen qatar vıtse-premer otandyq munaı sektorynan túsetin kiristerdiń tolyq kólemde tikeleı Ulttyq qorǵa jiberiletinine arnaıy nazar aýdardy, sol sebepti olar respýblıkalyq bıýdjetke standartty salyq túsimderin esepteý kezinde esepke alynbaıdy.
– 2025 jyly bıýdjetke QQS túsimi 6,1 trln teńgeni qurady. Bul 2024 jylmen salystyrǵanda 18%-ǵa kóp. Biraq osyǵan qaramastan, biz bıýdjet josparyn 656 mıllıard teńgege oryndaǵan joqpyz. Óıtkeni josparda QQS qaıtarýǵa 877 mıllıard teńge qarastyrylǵan, al biz 1 trln 354 mlrd teńge qaıtardyq. Sol sebepti de osyndaı problema bar, - dep atap ótti Serik Jumanǵarın.
Buǵan deıin Úkimet Torǵaı óńirindegi áleýmettik-ekonomıkalyq jobalardy iske asyrýǵa basymdyq beretinin jazǵan edik.
